Pontevedra despide o Ano Castelao cunha placa na casa onde viviu

O Ano Castelao rematou en Pontevedra cun emotivo acto coma un punto e seguido a todo o legado político, cultural e social que o intelectual de Rianxo deixou ao longo da súa vida.

A Boa Vila, lugar onde viviu e desenvolveu parte do seu legado, conta desde onte cunha placa que lembrará a súa pegada nesta vila, unha cidade da que Castelao sempre quixo formar parte e na que sempre levou o xentilicio de pontevedrés. A placa está no número 1 da Praza de España e recolle o seguinte texto: “Nesta casa viviron Alfonso Daniel Rodríguez Castelao e Virxinia Pereira”. Na súa parte superior, aparece a icónica sinatura do intelectual galeguista, ao carón dunha caricatura de si mesmo.

A homenaxe contou coa participación dos alumnos pontevedreses Fiama Del Canto Sogo e Francisco Kabila, do IES Valle-Inclán; Natasha Andra Rios Ciorba e Fiz Bello Alonso, do IES Frei Martín Sarmiento; e Carla Bouzas Pérez, do IES Xunqueira II, que leron textos en alusión á emigración e á importancia da identidade.

A presidenta do Consello de Cultura Galega, Rosario Álvarez, destacou a implicación da cidade cos valores do intelectual galeguista e fixo fincapé en “construír unha Pontevedra e unha Galicia dignas dos desexos de Castelao, orgullosas transmisoras da tradición, respectuosas e donas do seu futuro”.

Pola súa banda, a alcaldesa en funcións, Eva Vilaverde, destacou que “Castelao non foi un visitante circunstancial nesta cidade. Pontevedra foi para el un espazo querido, un fogar intelectual e político, un lugar desde o que mirar o país con máis claridade”.

A interpretación do himno galego coa agrupación Os de Algures pechou o acto, que contou coa participación de todos os partidos políticos e asociacións da vila.