Edugal mostra a formación de maior inserción laboral

O equipo do IES Politécnico de Vigo no seu stand de Edugal, no Recinto Feiral de Pontevedra. | I.L.

Coñecer os minerais ou o corpo humano a través da Realidade Virtual, manexar un simulador loxístico ou saber cómo se constrúe un vehículo eléctrico son só algunhas das cousas que se poden facer na 14 edición da Feira da Educación de Galicia, Edugal, en Pontevedra.

O evento, organizado por Aempe, en colaboración co Concello, abriu onte as súas portas no Recinto Feiral con 64 expositores, entre os que se atopan as tres universidades públicas galegas, con 22 facultades con stand propio, a UNED, outras universidades de Madrid, Salamanca e Portugal, centros de Formación Profesional, e as Forzas Armadas.

O robot humanoide que saúda aos visitantes. | D.P.

No primeiro día, alumnos de 180 escolas e institutos encheron o salón no que os Centros Integrados de Formación Profesional acaparan as miradas coas demostracións prácticas. María Dolores Méndez, xefa do departamento de Edificación e Obra Civil do IES Politécnico de Vigo, explica que “estamos aquí para potenciar a nosa familia porque hai moita demanda de profesionais”. A docente asegura que a oferta laboral no sector é tan alta que piden á Xunta que lles permita ampliar as prazas.

David Sánchez, profesor dos ciclos de Automoción no IES Vilalonga de Sanxenxo, tamén asegura que os alumnos do sector saen prácticamente “co traballo asegurado”. No seu stand, está Marta Esperón, unha das 3 alumnas do Ciclo Medio de Electromecánica que mostra a súa experiencia aos asistentes e afirma que lle gustaría traballar nun taller. Outra vintena de Centros Integrados de Formación Profesional ensinan cómo se traballa en carpintería, sanidade, electrónica, hostelería, ou beleza e estética.

Profesores e alumno do IES Vilalonga, de Sanxenxo | I.L.

Raquel Pérez, directora de Captación de Alumnado e Innovación Científica da Escola de Enxeñaría de Minas trata de explicar “as experiencias prácticas e saídas laborais que teñen os graos vinculados á Escola con gafas de Realidade Virtual e unha maqueta que mostra cómo se fai a extracción e traballo en Enxeñería”. Raquel afirma que as “opcións de saídas laborais que temos están actualmente por riba do 90%. O campo que teñen é moi amplio, porque en Galicia temos explotacións mineiras e recursos que son utilizables”.

Alumnas de Bacharelato visitan o expositor da Escola de Enxeñaría de Minas e Enerxía da UVigo. | I.L.

Están presentes as tres universidades públicas galegas, a UNED, e centros de FP de toda a provincia con entrada gratuíta

Nun stand paralelo, Sonia García, estudante de Bacharelato, interésase por Enfermaría, malia que “estou aberta a todo porque a verdade non imaxinaba que había tantas opcións profesionais”. E sorpresa desperta tamén o expositor das Forzas Armadas, coa opción de subirse a un vehículo militar, xunto ao da Policía Nacional.

Unha alumna proba as gafas de Realidade Virtual en Enfermería | I.L.

Dentro das universidades, a UNED destacou onte pola súa oferta, a máis completa con 30 graos oficiais sen nota de corte que, ademais, presenta o sistema de financiamento ‘Plazox’, que permite aos estudantes fraccionar o pago da súa matrícula.

Edugal 2025 volverá a abrir hoxe, con entrada gratuíta, desde as 10.00 ata as 18.00 horas e mañá con orientacións personalizadas