“A derradeira lección do mestre” expoñerase no Museo Provincial

O presidente da Deputación, Luis López, e o vicepresidente provincial, Rafa Domínguez iniciaron as conversas co presidente do Centro de Galicia de Bos Aires, Jose María Alén, para a cesión temporal do cadro de Castelao, “A derradeira lección do mestre”, obra cumio do intelectual galeguista, ao Museo de Pontevedra e que poida ser exposto ao público no 2026.

“A derradeira lección do mestre” é a obra máis emblemática da colección Galicia Mártir, un conxunto de 31 debuxos repartidos en tres álbums sobre a Guerra Civil realizados polo artista e galeguista Alfonso Daniel Rodríguez Castelao. O Museo de Pontevedra custodia estas obras de arte que inclúen o debuxo orixinal que serviu de base para a elaboración deste cadro polo que a institución provincial e o Centro Galego de Bos Aires, que custodia a obra, están en negociacións para o seu traslado temporal a Pontevedra. Moi previsiblemente tratarase dunha cesión por catro meses para que esté exposta ao público no Museo de Pontevedra durante tres, segundo o vicepresidente provincial.

O cadro orixinal ten unhas dimensións considerables de 2 metros de alto por 1,5 metros de ancho e é incluso coñecido como ‘O Guernika Galego’. Unha vez que se formalice a cesión, pola que a Deputación se mostra optimista, será a primeira vez que “A derradeira lección do mestre” se poida ver na provincia de Pontevedra, e será a segunda vez en Galicia, tras o seu paso polo Gaiás, en Santiago, no 2018.

Pola súa banda, o presidente do Centro de Galicia de Bos Aires tamén amosou a súa satisfacción pola posibilidade de expoñer este lienzo no Museo Provincial. “A disposición é máxima para que os galegos non teñan que ir a Bos Aires para velo e podan facelo aquí”, sinalou Jose María Alén, quen engadiu que “A derradeira lección do mestre é un dos símbolos de Galicia indiscutiblemente e non é propiedade de Bos Aires é de toda Galicia e de todos os galegos”.

A directora do Museo de Pontevedra, Ángeles Tilve, salientou tamén a estreita relación entre Arxentina e Galicia arredor da figura de Castelao, desde onde chegou a lámina orixinal ata o Museo e que “esta iniciativa poida ser una realidade alegraría moito a Castelao”.

Pontevedra alberga actualmente a maior colección do galeguista de toda a comunidade galega, que pode visitarse de balde en varias salas do Edificio Castelao do Museo.