Un 46% máis de solo para O Campiño

O parque empresarial do Campiño, en Pontevedra, duplicará a súa superficie coa posta en marcha do proxecto de ampliación que levará a cabo a Xunta, a través da sociedade Xestur, dando así resposta á falta de solo industrial neste concello e na súa comarca.

Con este motivo, a Xunta de Galicia deu inicio á tramitación do Plan Estruturante de Ordenación de Solo Empresarial (PEOSE) para a ampliación deste polígono, que suporá incrementar en 160.044 metros cadrados a súa superficie actual, un 46% máis, e cun investimento previsto de 11,6 millóns de euros.

Este proxecto, promovido por Xestur, está previsto no Plan Sectorial de Ordenación de Áreas Empresariais de Galicia (PSOAEG) e busca dotar de máis solo empresarial para atender as demandas dos emprendedores da comarca de Pontevedra, xa que o polígono actual, de 343.291 metros cadrados, non ten superficie dispoñible.

O PEOSE é o instrumento necesario para planificar e ordenar o ámbito da actuación delimitada no PSOAEG, a ferramenta coa que a Xunta de Galicia busca analizar, diagnosticar e ordenar a implantación das áreas empresariais de interese autonómico. Durante a redacción do proxecto foi necesario adaptar a planificación inicial debido a que se detectaron distintas afeccións sectoriais, como os dereitos mineiros dunha canteira lindeira, polo que a ampliación do parque empresarial ascenderá a unha superficie total de 160.045 m².

Co inicio da tramitación, o PEOSE someterase a avaliación ambiental estratéxica, que deberá emitir un informe preceptivo para a súa aprobación inicial, que se levará a cabo no primeiro trimestre de 2026. O obxectivo é acelerar os prazos, dentro do cumprimento da normativa vixente, para incrementar a dotación de solo empresarial na comarca de Pontevedra.

Proxectos para a comarca

Neste senso, a Xunta de Galicia ten en marcha diversos proxectos para ampliar o solo industrial na bisbarra de Pontevedra que suporán incrementar en 624.854 m². Ademais desta actuación, está en fase de proxecto de reurbanización a Central de Transportes e Terminal Intermodal de Ponte Caldelas, cunha superficie de 86.963 m², que é lindeiro co parque do Campiño e co parque da Reigosa (Ponte Caldelas). Todos estes proxectos súmanse ao futuro parque empresarial de Fragamoreira, en Poio, o que fortalecerá o tecido empresarial de toda a comarca e facilitará o asentamento e crecemento de empresas nesta importante zona que se move ao redor da capital da provincia.