O Centro Loxístico do Salnés terá Formación para o Emprego

A Mancomunidade do Salnés pon en marcha o novo Centro Loxístico Multiservizos en Ribadumia, unha infraestrutura estratéxica que centralizará os servizos públicos da comarca.

O proxecto conta cun investimento total de 606.210 euros, dos cales 303.105 euros xa foron concedidos pola Xunta de Galicia.

Estas instalacións albergarán un Centro de Control Dixital do Ciclo da Auga, que permitirá mellorar o seguimento, a eficiencia e a xestión do servizo, así coma unha Oficina Técnica da Calidade da Auga que reforzará as garantías e os sistemas de control. Ademais, incluirá un Centro de Control de Especies Invasoras e Xestión Ambiental, clave para a protección do entorno natural e a coordinación eficaz das actuacións ambientais a nivel comarcal.

Outro dos eixos principais será a centralización do Parque de Maquinaria Comarcal e no ámbito da sustentabilidade, o proxecto aposta pola dixitalización da recollida de residuos e o reforzo da compostaxe de proximidade. A infraestrutura acollerá tamén o Salnés Lab, un espazo destinado á innovación e ao prototipado de solucións aplicadas á xestión pública, así coma un Centro Comarcal de Formación e Obradoiros de Emprego orientado á capacitación profesional e á xeración de novas oportunidades laborais.

O Presidente da Mancomunidade, David Castro, destaca que esta actuación non é só a rehabilitación dunha nave, senón “unha aposta decidida pola modernización dos servizos públicos, a innovación e a sustentabilidade, reforzando ao tempo a cohesión territorial e a optimización dos recursos a través da cooperación institucional”. A entidade destaca tamén que a colaboración entre administracións resulta fundamental para facer realidade un investimento desta magnitude, ao non dispor de recursos propios para afrontalo en solitario. A Mancomunidade inclúe a Sanxenxo, Ribadumia, Cambados, Meis, Meaño, Vilanova, Vilagarcía, A Illa y O Grove.