A Xunta instalará ata 20.000 trampas para vespas velutinas

O conselleiro de Presidencia, Xustiza e Deportes, Diego Calvo, foi o encargado de colocar onte a primeira das 20.000 trampas para actuar nos niños primarios de vespa velutina, que son os primeiros en aparecer, e capturar así ás raíñas.

En concreto, fíxoo en Oleiros, municipio coruñés no que se instalarán 389 trampas, cinco máis que o ano pasado. Unha actuación que está dirixida especialmente á captura das raíñas e que no proxecto piloto supuxo a instalación dunha cifra similar de trampas con máis de 113.200 raíñas atrapadas.

De feito, a Xunta indicou nunha nota de prensa que, grazas a esta medida, o número de avisos reduciuse o ano pasado un 46%, ao pasar dos 49.400 de 2023, aos 26.200. Un trampeo “planificado, selectivo e xeolocalizado avalado por técnicos e especialistas coordinados por científicos e investigadores, dando resposta a unha das principais demandas dos colectivos afectados pola vespa velutina”.

Actuación sobre niños

Segundo explicou o Goberno galego, a actuación sobre os niños primarios contribúe a evitar a súa proliferación e a aparición de futuros niños secundarios e destacou que, debido ao seu carácter selectivo e co uso de trampas adecuadas, minimízanse os posibles efectos secundarios negativos derivados da posible captura doutras especies.

Nesta liña, están a organizarse actividades de formación dirixidas ao persoal de campo encargado de colocar, revisar e retirar as trampas, e impartiranse charlas informativas e de divulgación por toda a comunidade para que a cidadanía coñeza o ciclo da vespa velutina, a súa expansión e as consecuencias negativas socioeconómicas e ambientais da súa implantación, coa finalidade de loitar conxuntamente contra esta praga.

O plan centralizado de retirada de niños, acordado cos concellos, permitiu a retirada de máis de 18.700 niños o ano pasado. A Coruña foi a provincia que rexistrou un maior número de niños eliminados ou neutralizados en 2024, con máis de 8.600, seguida dos máis de 5.800 da provincia de Pontevedra. En Lugo e Ourense retiráronse e neutralizaron máis de 2.000 e máis de 2.200 niños, respectivamente.

Desde a alerta recibida no Teléfono de Atención e Información á Cidadanía 012, procédese á súa retirada “no menor tempo posible”, aínda que hai casos nos que os niños son “inalcanzables ou dificilmente accesibles”.