A Xunta fixa ata 15.000 euros de sanción por agredir a un profesor

O Goberno autonómico actualizará a normativa que regula a convivencia nas aulas, con novidades encamiñadas a que Galicia sexa “a primeira en protexer a autoridade” docente. Segundo anunciou onte o conselleiro de Presidencia, Xustiza e Deportes, Diego Calvo, a agresión a un profesor por parte de pais, representantes legais e mesmo dos propios alumnos poderá supor unha multa de ata 15.000 euros. Calvo substituíu o presidente autonómico, Alfonso Rueda, que estaba de viaxe institucional en Bruxelas.

Na comparecencia de prensa, Calvo explicou que estas multas se canalizarán a través dunha Oficina de Apoio ao Profesorado, un organismo no que os docentes recibirán asesoramento xurídico, acompañamento en caso de interpor denuncia e apoio psicolóxico se for preciso. “A resposta, como é obvio, adaptarase á gravidade de cada situación”, indicou Calvo, antes de precisar que cada caso será avaliado de forma específica.

Haberá máis cambios normativos, que se explicitarán na próxima lei de medidas que acompañará os Orzamentos para 2027. Ademais de crear unha categoría intermedia entre as condutas leves e as moi graves nas aulas, “actualízase” a definición das consideradas “de maior gravidade”, que incluirá expresamente as ameazas, as vexacións, a violencia machista ou o acoso. Segundo indicou o conselleiro, “cando se incorra nun destes inadmisibles comportamentos”, a sanción poderá ser a expulsión do centro e, se se produce na etapa de ensino obrigatorio, o “cambio forzoso” do mesmo. Ademais, “reforzarase a finalidade educativa das sancións, facendo fincapé en que o alumnado acepte as consecuencias e repare o dano causado”.

O Goberno galego acometeu tamén o desenvolvemento do título II da Lei de Xuventude de Galicia para “mellorar a calidade” dos servizos de lecer e tempo libre que se prestan á mocidade da comunidade con medidas para “incrementar o número de monitores nos campamentos ou flexibilizar os requisitos para poder exercer este traballo”. Así se recolle no proxecto de decreto co que se actualiza esta normativa que foi analizado no Consello e que se publicará nos próximos días no Diario Oficial de Galicia “despois dun longo proceso de participación e diálogo cos axentes implicados a través de distintos espazos como reunións, sesións de traballo, unha caixa de correos ou foros.

O obxectivo, segundo explicou Diego Calvo, acompañado do titular de Cultura, Lingua e Xuventude, José López Campos, é “actualizar e adaptar a normativa ás necesidades xurdidas nos últimos anos”.