A Xunta estuda recorrer a lei de vivenda no Constitucional

A Xunta recorrerá á vía xudicial se o Goberno central non dá resposta nesta semana ás propostas remitidas nos últimos días polo Observatorio da Vivenda de Galicia para modificar a lei estatal de vivenda e evitar conflitos de competencias coas autonomías, así o avanzou onte a conselleira de Vivenda, Ángeles Vázquez, antes da reunión do Observatorio. Vázquez informou ademais de que a Xunta está a traballar na posible presentación dun recurso de inconstitucionalidade contra a lei mediante a recompilación de distintos argumentos como un informe preceptivo solicitado ao Consello Consultivo de Galicia.

Precisamente, a responsable autonómica incidiu antes da reunión deste órgano consultivo sobre o sector da vivenda en que os prazos para presentar o recurso de inconstitucionalidade se esgotan e que o Executivo central debe actuar con celeridade dando resposta ás peticións de cambios -coa introdución de axustes ou a supresión de certas partes do texto- para evitar os conflitos de competencias existentes coas autonomías. Do contrario, Galicia seguirá os pasos que xa deron outras comunidades como Andalucía, Baleares ou Madrid.

Inseguridade

A vicepresidenta segunda detallou que o documento remitido polo Observatorio ao Goberno central dá resposta ao compromiso adquirido na reunión da comisión bilateral do pasado mes de xaneiro, onde a Comunidade acordou trasladar as partes do texto lexislativo nas que considera necesario introducir modificacións para evitar o conflito competencial.

Entre elas, salientou cuestións relacionadas coa okupación ou co alugueiro de vivendas. “Non imos permitir que a okupación sexa o título habilitante para acceder a unha vivenda pública nin que a inseguridade que xera afonde na retirada de vivendas do mercado do alugueiro optando pola venda ou o uso turístico”, aseverou Vázquez.

A responsable autonómica pediu ao Goberno central “que actúe con seriedade e rigorosidade dando unha resposta inmediata ao Observatorio”.

A vicepresidenta segunda subliñou que está na man do Executivo central evitar un novo recurso de inconstitucionalidade contra a lei de vivenda estatal e incidiu en que os servizos xurídicos do Goberno galego teñen perfectamente analizado o texto lexislativo por se fose necesario recorrer á vía xudicial para resolver o conflito competencial. Precisamente, ese traballo complementarase co informe do Consello Consultivo.

“A Xunta advertiu desde o primeiro momento de que a nova lei polo dereito á vivenda foi aprobada sen o consenso das comunidades autónomas, invade parte das súas competencias, xera confusión normativa e inseguridade, ataca o dereito á propiedade, prima aos okupas fronte aos propietarios e aposta por un modelo intervencionista que Galicia non comparte así como por medidas sancionadoras en lugar de fixar incentivos e medidas de estímulo para os propietarios”, precisou a Xunta nun comunicado.

“Contrasta a actuación da Xunta neste caso, apostando polo diálogo, co comportamento do Goberno central noutras situacións semellantes como a Lei do litoral de Galicia, que foi recorrida directamente polo Executivo central ante o Tribunal Constitucional sen a convocatoria dunha comisión bilateral”, lamenta a Xunta.