O plan da lingua suma case 700 medidas á normalización

A Xunta presentou onte a proposta de actualización do Plan xeral de normalización da lingua galega, un documento con case 700 medidas para marcar as políticas lingüísticas da vindeira década. O conselleiro de Cultura, Lingua e Xuventude, José López Campos, deu a coñecer o texto nun acto celebrado en Compostela ante preto de 800 asistentes.

A actualización, coordinada polo académico Manuel González, responde á nova realidade social e demográfica de Galicia. Pon especial énfase en achegar o galego á poboación nada fóra da comunidade, cuxo peso demográfico medrou nos últimos anos, e en adaptar a lingua aos novos espazos de socialización dixital e ás redes sociais.

López Campos salientou que o documento nace dun proceso participativo no que se implicaron máis de 130 profesionais repartidos en 11 comisións, ademais de institucións, entidades e particulares que achegaron máis de 400 contactos e 1.400 propostas. O conselleiro falou dun “gran pacto social” e agradeceu o esforzo de quen entendeu que a lingua é de todos.

Un selo

Entre as medidas máis destacadas figura a creación dun selo de recoñecemento para negocios que acrediten o uso do galego, que podería dar acceso a vantaxes en trámites coa Administración autonómica. No ámbito sanitario proponse un servizo lingüístico propio no Sergas, que se sumaría aos cursos xa existentes para o persoal sanitario.

En xustiza, a proposta impulsa a implantación en galego do novo sistema procesual Atenea e a aprobación dunha Lei da lingua que complemente -sen modificala- a Lei de Normalización Lingüística de 1983. No terreo educativo séntanse as bases para futuros axustes normativos, sempre que exista unanimidade, e apóstase por reforzar o galego mediante radio escolar, teatro e dinamización bibliotecaria.

Dous órganos

O documento tamén prevé a creación de dous novos órganos: o Consello Social da Lingua Galega, como foro de participación cidadá, e un instituto para coordinar a proxección exterior da lingua e a cultura galegas. López Campos salientou ademais a vontade de estreitar lazos coa lusofonía, un espazo de máis de 270 millóns de falantes de portugués.

A proposta, xa entregada ao presidente do Parlamento de Galicia, Miguel Ángel Santalices, queda agora en mans dos grupos políticos, que deberán analizala e debatela. López Campos insistiu en que o Goberno galego mantén a súa vontade de diálogo para acadar un acordo “polo ben da lingua”, á que cualificou de símbolo de identidade que merece consenso. O acto, presentado pola xornalista Esther Estévez e o actor Xosé Antonio Touriñán, contou coas intervencións da cantante Fátima Pego e o poeta Simón Rodríguez, entre outros.

O BNG reafirma a súa posición, lonxe do pacto

O novo Plan xeral de normalización é froito dun proceso participativo con máis dun cento de expertos e centos de propostas cidadás, segundo a Xunta. O texto, coordinado polo académico Manuel González, prioriza a incorporación do galego entre a poboación foránea e a súa presenza no ámbito dixital.

Entre as novidades, xunto ao servizo lingüístico propio no Sergas e a implantación en galego do sistema xudicial Atenea, López Campos referiuse a unha futura Lei da lingua complementaria á norma de 1983.

Respecto disto, o conselleiro de Cultura, Lingua e Xuventude, amosouse disposto a negociar co resto das forzas políticas representadas no Parlamento de Galicia a presenza da lingua no ensino, que na actualidade está regulada polo Decreto do Plurilingüismo de 2010. “Sempre que exista a unanimidade necesaria”, matizou.

A presentación non ficou libre de críticas. A política lingüística segue a ser unha das frontes de desgaste entre o Goberno galego e a oposición. A voceira nacional do BNG, Ana Pontón, lamentou que o Pacto pola lingua “manteña o decreto da vergoña”, en referencia ao decreto de plurilingüismo de 2010, e cualificou de propaganda o acto organizado pola Xunta.

O decreto de 2010

A líder do Bloque acusou a Rueda de converter o galego nunha lingua de segunda na educación e insistiu en que non se trata dun pacto, senón dun intento de tapar dezasete anos de políticas contrarias ao idioma. Pontón lembrou ademais que Rueda encabezou no seu día unha manifestación contra o galego promovida por Galicia Bilingüe e que respaldou o veto do PP ao uso do galego no Congreso. O decreto de plurilingüismo de 2010, aprobado polo primeiro Goberno de Feijóo, estableceu que como máximo un terzo das materias se impartisen en galego nos centros educativos, repartindo o resto entre castelán e inglés. Dende entón, o BNG e distintos colectivos reclaman a súa derrogación.