Temos un soño

Unha sociedade aberta ao coñecemento, preparada para avanzar e mellorar a vida das persoas, pensamos que é posible.

En primeiro lugar, porque o noso xeito de estar no mundo é agarimoso coas persoas e respectuoso coas diferenzas. Temos a sensación de que, neste momento, se dan moitas condicións para que no noso país agrome a sabedoría e poidamos actuar como faros que alumeen o presente e o futuro.

No pasado fomos terra de emigrantes. Foron moitas as persoas que tiveron que atopar noutras latitudes o sustento e unha vida digna. Somos conscientes do agarimo e dos brazos abertos que atopamos en moitas latitudes. Tanto é así que en moitas cidades de Iberoamérica e doutros países vive aínda Galicia. Espero que sexamos quen de atopar esa mesma sensibilidade para as persoas que, neste momento e aproveitando a situación de Galicia, se achegan onda nós para buscar o mesmo que buscaron tantos galegos e galegas hai tempo. Sexamos terra de acollida e aproveitemos todo o potencial das persoas que chegan para que o país progrese e medre.

Un dos retos máis importantes que temos como sociedade é a reversión do problema demográfico. A poboación galega, pola baixa natalidade, está a sufrir un envellecemento e unha falta de renovación. Pois ben, as chegadas de novos galegos e galegas (moitos deles con parentes da Galicia emigrante) están a cubrir parcialmente ese reto demográfico e, daquela, están axudando a evitar que a nosa sociedade teña unha abrupta caída e continúe na senda da prosperidade.

A Universidade de Vigo tamén pode ser unha boa ferramenta para axudar nos retos do futuro. Por unha banda, somos unha universidade europea, pública e de calidade contrastada, que pode servir para atraer estudantes doutras latitudes, que gocen da excelencia na súa formación e que poidan namorarse da nosa terra e seguir connosco como novos galegos e galegas.

Por suposto, o sistema universitario público galego ten como primeiro obxectivo facer que todo o talento que sae de Galicia e que se achega ás nosas aulas agrome, sexa pulido e multiplique a capacidade creadora dunha sociedade artellada, próspera e xenerosa. Nin que dicir ten que a nosa Universidade de Vigo ten un forte compromiso coa nosa terra, co espallamento da nosa lingua e da nosa cultura, coa formación do noso estudantado e coa xeración de coñecemento. Aspiramos ao mesmo tempo a que os novos coñecementos sexan útiles para a nosa sociedade no seu conxunto, tanto no eido público coma no privado.

Así que pensamos que nesta situación paga a pena confiar na nosa xuventude. Temos todos os vimbios para formar unha Galicia baseada no coñecemento, que mire de igual a igual calquera das rexións máis desenvolvidas de Europa. Que aproveite ao máximo a combinación de talento e de esforzo da nosa mocidade. Que sexa quen de ofrecer un lugar onde, ademais de gozar das marabillosas paisaxes, do clima suave e da rica cultura, poidamos exportar coñecemento e valores na construción dunha Europa que mereza a pena e que sexa quen de influír para construír un mundo mellor. Un mundo que ten que ser, necesariamente, igualitario, inclusivo e fraterno. Para iso precisamos do esforzo de todas as persoas. Xuntos seremos máis fortes e conseguiremos o lugar en Europa e no mundo ao que lexitimamente aspiramos.

Viva Galicia! Que vivan as persoas que forman parte da nosa sociedade!

Manuel Reigosa Roger, reitor da Universidade de Vigo