Rueda tece alianzas para facer negocios entre México e Galicia

O presidente da Xunta mantivo onte un almorzo con representantes do tecido industrial en México. Alfonso Rueda asegurou que Galicia é a ponte natural entre Europa e América e que está nunha “excelente posición” para afrontar os retos económicos dos vindeiros anos. Ademais, na última xornada da súa viaxe a América, subliñou que a Xunta apoia o investimento industrial na comunidade ao “dar seguridade xurídica ás empresas”, reducir os prazos dos trámites e apostar pola colaboración público-privada.

O presidente da Xunta resaltou a estabilidade política, a solvencia financeira e a situación xeográfica estratéxica de Galicia como as mellores credenciais para que empresarios doutros países aposten por desenvolver os seus negocios na comunidade galega. Rueda mantivo un encontro con empresarios mexicanos, galegos e españois, aos que animou a reforzar as alianzas económicas e comerciais con Galicia.

Rueda trasladou aos empresarios a gran oportunidade que supón investir na comunidade galega xa que Galicia está “nunha excelente posición para afrontar os retos económicos dos vindeiros anos e ofrece grandes posibilidades ás empresas que apostan por esta terra”.

Durante a súa intervención, asegurou que son varios os factores que fan de Galicia unha terra de oportunidades para os empresarios de fóra do país. En primeiro lugar, Rueda resaltou o feito de contar cunhas institucións estables que ofrecen plena seguridade xurídica e garantías aos posibles inversores.

Ademais, fixo fincapé nos bos datos económicos que acreditan a recuperación de Galicia tras a pandemia e que amosan que se trata dunha comunidade que crece e xera emprego.

E en terceiro lugar, Rueda puxo en valor a situación xeográfica estratéxica de Galicia que a sitúa coma a rexión que actúa de ponte natural entre Europa e América, pero tamén no punto central do Arco Atlántico, que comunica o continente europeo así como o continente africano.

O presidente lembrou a gran oportunidade que supoñen os fondos europeos para o desenvolvemento de novos proxectos en Galicia e lamentou a demora e falta de axilidade na xestión dos mesmos por parte do Goberno central.

Tras este primeiro almorzo con diferentes empresarios, Rueda mantivo tamén un encontro con inversores mexicanos.

Ademais, Rueda resaltou a importancia da colaboración público-privada e puxo como exemplo a sociedade Impulsa que está a ser a panca para desenvolver proxectos estratéxicos para a economía galega como será unha planta de fibras téxtiles de orixe vexetal, unha factoría de hidróxeno verde ou a instalación dun centro de datos para xestionar os datos do ecosistema empresarial galego.

O domingo pola noite, o presidente da Xunta asistiu á representación da obra teatral “Canta máis luz, máis sombra”, unha coprodución do Centro Dramático Galego e a Compañía Nacional de Teatro do país mexicano.