Rueda reivindica a súa política afastada do "ruído"

Desde o Museo de Pontevedra e destacando o Ano Castelao, o presidente da Xunta, Alfonso Rueda, reivindicou na súa mensaxe institucional de Fin de Ano as políticas do seu Goberno pensadas para o longo prazo e afastadas do “ruído”.

Confirmou que ao longo de 2026 estarán en marcha 4.000 novas vivendas públicas, no marco do compromiso de duplicar o parque público de vivenda durante a lexislatura. O obxectivo, segundo indicou, é facilitar o acceso a un fogar tanto ás mozas e mozos que se emancipan como ás máis de 44.000 persoas que chegaron a Galicia ao longo de 2025 para establecerse na comunidade.

Rueda destacou tamén a aposta pola investigación e a innovación, cun investimento anual superior aos 1.000 millóns de euros en I+D+i. Neste eido, avanzou que Galicia contará co supercomputador público máis potente do sur de Europa e cunha das novas fábricas de Intelixencia Artificial previstas no continente, situando a comunidade como un referente tecnolóxico.

O presidente falou tamén dos incendios forestais do verán, apelando ao traballo conxunto e á necesidade dunha xestión responsable do monte, así como á defensa dun modelo económico baseado na economía circular, as enerxías limpas e sectores estratéxicos como o agroalimentario, o téxtil e a automoción.

No ámbito social, puxo o acento na educación, na sanidade pública e na protección da infancia e da adolescencia, salientando medidas como a regulación do uso das pantallas no ámbito educativo e a prohibición do consumo de bebidas enerxéticas a menores. Tamén reiterou o compromiso da Xunta coa loita contra a violencia de xénero e o acoso escolar.

A mensaxe concluíu cun recordo especial para as persoas que pasan estas datas en soidade, para os emigrantes galegos e cun desexo de “un 2026 cheo de benestar, paz e prosperidade” para toda a cidadanía.