Rueda, no Día de Galicia: "Temos que recuperar a integridade e o respecto á lei"

O presidente da Xunta, Alfonso Rueda, exerceu como delegado rexio na Ofrenda ao Apóstolo Santiago que se celebrou este venres polo Día de Galicia. No seu discurso urxiu a "recuperar a integridade e o respecto á lei" nunha España "enfrascada na polarización extrema" e "manchada por prácticas impropias de persoas decentes".

No seu discurso na Catedral, Rueda pediu ao Apóstolo, "señor Santiago", "recuperar a credibilidade e a lexitimidade de organizacións e institucións" no país.

Deste xeito lanzou a petición ao Apóstolo Santiago de "inspiración e acerto para todos os gobernantes" e as "persoas que se enfrontan á toma de decisións que repercuten na vida dos demais", ademais de apelar a construír unha Galicia "próspera".

A Catedral de Santiago, como é tradicional cada 25 de xullo, Día de Galicia, acolleu a Eucaristía para conmemorar ao Apóstolo Santiago, patrón de España, na que participaron autoridades civís e militares.

Nesta misa estiveron, entre outros, o presidente do Parlamento galego, Miguel Ángel Santalices Vieira; o delegado do Goberno en Galicia, Pedro Blanco; e o presidente do Partido Popular, Alberto Núñez Feijóo. Previamente, na Praza do Obradoiro, a alcaldesa de Santiago, Goretti Sanmartín, participou no saúdo ás autoridades.