Rueda advirte: “Os incendios non se paran tan so con leis”

O presidente da Xunta, Alfonso Rueda, advertiu que as leis por si soas non frean os incendios forestais e lamentou que as “medidas represivas, de prevención, do que sexa” caen fronte á acción de “desalmados”. Referiuse concretamente ao lume da Cañiza (Pontevedra), que obrigou ao confinamento de sete núcleos de poboación, tras detectarse cinco focos ao longo dunha mesma estrada. “Hai cousas que as leis non poden facer. Dependen das persoas”, sinalou, subliñando a necesidade dunha maior conciencia social sobre os riscos e as consecuencias dos incendios.

Rueda apuntou que “canto menos abandono haxa no monte” e “canta máis concienciación” exista, máis se avanzará na prevención, e que ese esforzo tamén debe quedar reflectido na nova lei en elaboración. Pediu un maior compromiso cidadán: “unha concienciación da xente sobre o mal que fai, de como poñer en perigo (...) desde logo propiedades e mesmo a vida das persoas”.

Tamén recoñeceu as dificultades para identificar os autores dos lumes e lograr probas suficientes para condenalos, mesmo cando se detén a un pirómano. Aínda así, insistiu en que “os incendiarios teñen que saber que se fai todo o posible para pescudar quen son e que caia todo o peso da lei”, facendo un chamamento a non relaxar a vixilancia.

Defendeu as políticas de prevención da Xunta, asegurando que “ao principio foi complicada a colaboración cos concellos”, pero que agora se avanzou “bastante”, sobre todo nas zonas habitadas. “A situación é moi diferente ao que era hai poucos anos”, destacou.

Sobre a moratoria á plantación de eucaliptos, vixente ata finais deste ano, sinalou que se abriron consultas internas con todos os sectores implicados. A decisión, que se tomará despois de agosto, “probablemente non contentará a todo o mundo”, pero buscará ser “o máis consensuada e o máis entendible posible”. “Gobernar é decidir”, insistiu.

Defensa a barba

En canto á violencia machista, respondeu ao Consello de Contas defendendo que o investimento da Xunta aumentou e prioriza a atención directa ás vítimas. Lembrou que Galicia é a única comunidade que lles proporciona unha achega mensual ás vítimas para facilitar a súa independencia económica. “Todos eses recursos foron aumentando porque están aumentando as vítimas”, indicou.

Respecto á polémica polo informe de Contas e as alegacións do director xeral de Loita contra a Violencia de Xénero, Roberto Barba, Rueda rexeitou as críticas da oposición e cualificou de “frivolizar” a petición da súa destitución. Definiu a Barba como “unha persoa moi experta” e “moi concienciado”, asegurando que ten plena confianza nel. “Estou seguro de que sabe do que fala”, dixo, e pediu contextualizar as alegacións, presentadas nun procedemento interno, non como declaracións públicas.

Ademais, Rueda expresou a súa preocupación pola evolución do cambio climático, que está a agravar a virulencia e frecuencia dos incendios forestais, e subliñou a necesidade de adaptar as políticas públicas a esta nova realidade. Reiterou que a prevención debe ser unha prioridade compartida entre administracións e cidadanía, e reclamou máis colaboración e implicación social. Tamén pediu comprensión cara ás decisións difíciles que o Goberno debe adoptar en cuestións ambientais e sociais.

“A fronte de comunidades por financiamento xa está montada, non hai que ir a un notario”

O presidente da Xunta, Alfonso Rueda, considera que non é necesario dar un “verniz máis formal” ao acordo entre autonomías para defender principios comúns en financiamento, xa que a “fronte común” xa está “montada” e consolidada, mesmo ante a cota catalá. En palabras súas, “non hai que ir a un notario para montar esa fronte común, nin ao rexistro da propiedade, nin nada”.

Rueda reprocha ao presidente do Goberno, Pedro Sánchez, que lle dixese que “case non valía a pena tentar” reformar o modelo de financiamento porque “era moi difícil pornos de acordo”. En contraste, lembra a Declaración de Santiago de 2021, asinada por varias comunidades, como un bo punto de partida para avanzar.

Sobre a posibilidade de actualizar este acordo, Rueda afirma que non tería “ningún problema” en facelo se é necesario, pero que se iso xerase tensións ou dúbidas, mellor “deixalo así”, porque “todo o mundo ten claro que seguimos pensando o mesmo”.

Respecto á condonación da débeda, Rueda sostén que, como medida illada, “non lle vexo ningunha vantaxe” e que sería un “mal negocio” aceptar deixar de pagar 35 millóns ao ano para non poder discutir despois 500 millóns máis nunha reforma do financiamento. Con todo, abre a porta a aceptala “se vai acompañada do que realmente lle interesa a Galicia” e con condicións claras, como que o Goberno se comprometa a debater e pechar a reforma nun prazo razoable.

Sobre as eleccións xerais, Rueda considera que son “urxentísimas” e que “esgótaselle o tempo a Galicia e a España”. Afirma que non ve outro camiño en España que unhas eleccións, ante a situación de “corrupción” no Goberno central e a falta de interlocución con ministerios. Finalmente, sobre o fiscal xeral do Estado, Álvaro García Ortiz, sinala que a situación actual é “surrealista” e apoia modificar a lei para que o seu procesamiento implique o seu cesamento automático.

Admite que os delitos vinculados coa inmigración “non son os únicos”

Na entrevista, sobre se considera que hai maior inseguridade en Galicia por mor da inmigración, reafirmouse en que el o que defende é “unha inmigración ordenada” e lembrou que a Xunta pediu o traspaso das competencias para poder xestionar as autorizacións iniciais de traballo das persoas estranxeiras e está pendente de resposta do Goberno estatal.

Admite que a vinculada coa inmigración “non é o único tipo de delincuencia que se está producindo”, pero esgrimiu que el tampouco dirá que hai “cero problemas”. “Vimos algúns casos, con todas a reservas das investigacións e as decisións xudiciais que nos alarman bastante. Quere dicir isto que é o único tipo de delincuencia que se está producindo? Non. Agora, que tamén podemos ter delincuencia con esta orixe, pois si”, argumentou.

En canto ao futuro político do presidente valenciano, Carlos Mazón, despois da dana, e se el dimitise, respondeu que o seu compañeiro no PP “empeñouno todo nunha cousa moi complicada, que é a reconstrución efectiva”. “Hai que darlle toda a confianza. Polo menos, darlle unha oportunidade. Pediuna, tena e espero que a aproveite”, aseverou. Finalmente, a pesar da sombra do “caso Montoro”, defendeu a recente foto de Feijóo cos expresidentes José María Aznar e Mariano Rajoy. “Enviou a mensaxe de non renegar, coas súas luces e as súas sombras, do pasado deste partido”, resolveu.