A RAG incorpora "canteirán" ao dicionario galego a petición do Celta
A Academia amplía tamén o significado de "canteira" con dúas novas acepcións deportivas e utiliza o club vigués como exemplo na definición
A Real Academia Galega (RAG) incorporou a palabra "canteirán/-á" ao Dicionario da Lingua Galega a petición do Celta, nun recoñecemento lingüístico á importancia da formación de deportistas nos clubs. A institución tamén ampliou o significado de "canteira" con dúas novas acepcións relacionadas co ámbito deportivo, dando cabida a un termo profundamente vinculado á identidade do celtismo.
A partir de agora, "canteirán/-á" aparecerá no dicionario tanto como adxectivo, para definir un deportista formado na canteira do seu club, como substantivo, para referirse a ese mesmo xogador ou xogadora. A actualización incorpora tamén dous novos significados para "canteira": o lugar ou institución de procedencia de persoas con talento para unha actividade especializada, especialmente no deporte, e o conxunto de deportistas que se forman nun mesmo club.
O Celta, presente nos exemplos do dicionario
A nova entrada inclúe unha referencia expresa ao club vigués nun dos exemplos utilizados pola RAG para ilustrar o termo: "Vinte e dous canteiráns debutaron co Celta nos últimos dez anos".
Esta mención pon de relevo o papel da canteira na traxectoria da entidade celeste e recoñece o uso dunha palabra que conta con presenza documentada na prensa galega desde hai máis dun século.
O Celta agradeceu á Real Academia Galega a súa disposición e o seu traballo a prol da lingua. A entidade considera que a canteira vai máis alá da formación deportiva e representa tamén identidade, pertenza e orgullo. Con esta incorporación, o galego amplía a súa presenza no vocabulario do deporte e recolle oficialmente unha realidade moi ligada á cultura futbolística galega.
Contenido patrocinado
También te puede interesar
Lo último