O PSdeG inicia o camiño das primarias do 7 de abril

O PSdeG abre este luns o prazo de presentación de precandidaturas para as primarias para escoller secretario xeral, que terán lugar o 7 de abril. O prazo prolongarase até o xoves, 14 de marzo, ás 15,00 horas. Así o fixou onte a Executiva Nacional Galega dos socialistas, presidida polo seu actual secretario xeral, Valentín González Formoso.

O calendario aprobado sinala que a recollida de avais terá lugar entre os días 15 e 22 deste mes ás 12,00 horas. O 22 de marzo terá lugar a proclamación provisional de candidatos que presenten como mínimo o aval do 6% dos ao redor de 10.000 militantes con dereito a voto. Ademais, a campaña de información celebrarase entre o mércores 27 de marzo e o sábado 6 de abril, dando paso á xornada de votación, que será o 7 de abril e, no caso de que ningún dos candidatos sume o 50% dos votos, tería lugar unha segunda volta o 14 do mesmo mes.

De acordo co calendario aprobado, o 14 de abril terá lugar a proclamación provisional de resultados e o Congreso Extraordinario celebrarase o sábado 27 de abril. Tal e como se recolle no documento das bases da convocatoria do congreso e das primarias, só se abrirá proceso electoral interno de primarias no suposto de existir máis dun candidato proclamado. En caso de resultar proclamada definitivamente unha única candidatura, non se celebrará a votación e informarase á Comisión Nacional de Listas.

O comité organizador do proceso estará presidido polo secretario de Organización, José Manuel Lage Tuñas, acompañado por Lara Méndez, Alberto Varela, Margarita Martín Rodríguez e Silvia B. Fraga como vogais.

Renovación

Está previsto que o PSdeG leve a cabo unha renovación dos seus órganos tras os resultados das eleccións do pasado 18 de febreiro, nas que a candidatura encabezada por José Ramón Gómez Besteiro logrou nove escanos, o peor resultado histórico dos socialistas galegos. A pesar diso, tanto dirixentes da formación en Galicia como o propio Formoso, como a dirección nacional do PSOE pecharon filas en torno ao político lucense, a quen apuntaron como a persona que debe dar “estabilidade” á formación para fortalecer o seu proxecto de cara ao futuro. Aínda que se dá por feito no partido, polo momento Besteiro non confirmou publicamente que optará ás primarias.

Así mesmo, onte tamén se celebraron os comités provinciais dos socialistas en Pontevedra e Lugo para analizar os resultados das eleccións autonómicas. O secretario xeral de Pontevedra, David Regades, destacou que os resultados foron “moi malos”, pero “demostraron que sen un PSdeG forte non hai cambio posible”.

Mentres, o secretario xeral do PSdeG na provincia de Lugo, José Tomé, reivindicou que se atopan nun momento no que “toca mirar cara adiante” e “traballar pico e pa” no Parlamento e no territorio “co equipo e Besteiro para remontar”.