A nova lei de lumes atende os tipos de risco e a xestión territorial

O Consello da Xunta analizou este luns o anteproxecto da Lei de loita contra os incendios forestais de Galicia, antes da súa remisión ao Consello Forestal de Galicia, que está convocado para este martes. A futura norma pretende actualizar unha lexislación que, segundo o presidente da Xunta, Alfonso Rueda, ten “case 20 anos”, e adaptala aos novos tipos de incendios e aos avances na prevención e extinción.

Rueda explicou que o texto permitirá pasar dun modelo preventivo homoxéneo para todo o territorio a outro adaptado ao nivel de risco e ás características de cada zona. A conselleira do Medio Rural, María José Gómez, sinalou que o obxectivo é avanzar cara a unha “xestión integral do territorio” e remitir o proxecto ao Parlamento “o antes posible”.

Entre as principais novidades figura a incorporación do concepto de interface urbano-forestal, que abrangue terreos urbanos, de núcleo rural ou urbanizables con vexetación lindeira co monte. Nestes espazos, os criterios de xestión da biomasa e retirada de especies serán de aplicación directa.

O anteproxecto reforza instrumentos como as paisaxes mosaico e as devasas para crear descontinuidades estratéxicas de combustible mediante actividades agrogandeiras, silvicultura ou plantación de frondosas autóctonas. O mapa de risco de incendios será a base para delimitar zonas de alto risco, áreas estratéxicas de xestión e actuacións singularizadas.

Biomasa

A norma permitirá duplicar determinadas distancias de xestión da biomasa en zonas estratéxicas e establecerá medidas automáticas cando o índice de risco diario sexa moi alto ou extremo. Neses casos suspenderanse as autorizacións de queima, limitarase o uso de maquinaria que xere faíscas e reforzarase o control da pirotecnia.

Os axentes forestais, ambientais e das forzas de seguridade poderán ditar ordes verbais de execución inmediata ante perigos inminentes, como desaloxar áreas recreativas ou pechar camiños.

A rede de puntos de auga será considerada infraestrutura de seguridade estratéxica e prohibiranse construcións ou plantacións nun radio de 50 metros dos postos de vixilancia. As novas instalacións industriais e gasolineiras en terreos agroforestais ou na interface urbano-forestal deberán contar con hidrantes perimetrais.

A Xunta tamén prevé reforzar a colaboración con comunidades de montes e entidades locais, así como a concesión directa de axudas en situacións de incendios extraordinarios. A nova filosofía preventiva articúlase arredor da planificación do risco, a xestión da paisaxe, a silvicultura preventiva, a protección de persoas e infraestruturas e a execución efectiva das medidas.

Gómez resaltou que o anteproxecto marca como obxectivos o de “establecer un sistema preventivo vinculado ao territorio e a poboación para fomentar a agricultura e a gandaría extensiva”.