Homenaxe a Begoña Caamaño

A rede comercial da compañía galega de distribución alimentaria Vegalsa-Eroski celebra o Día das Letras Galegas homenaxeando a figura de Begoña Caamaño. A campaña chega a cento cincuenta dos seus establecementos hipermercados Eroski, supermercados Eroski Center e Autoservicios Familia con carteis conmemorativos deseñados polo alumnado do CEIP Plurilingüe de Ribadavia, nos que se reflicte a infancia creativa da autora. Ademais, as tendas contarán durante todo o mes de maio con bolsas de compra de edición especial.

Durante o sábado 16, os establecementos Autoservicios Familia e Eroski Center de Vigo, cidade onde naceu a xornalista e escritora, tamén repartiron marcapáxinas coa imaxe da campaña deste ano.

A maiores, o propio domingo, a compañía activará un sorteo especial no seu perfil de Instagram (@vegalsa_eroski) de cinco experiencias dobres con visita guiada a MEGA e maridaxe a escoller.

O supermercado Eroski Center de Portanet de Vigo acolleu o luns a pegada de carteis coa que a compañía presenta a súa campaña das Letras Galegas, froito dunha colaboración coa Xunta de Galicia. O evento contou coa participación do secretario xeral de Política Lingüística, Valentín García; a irmá da homenaxeada, Beatriz Caamaño; a académica de número e membro da directiva da RAG, María Dolores Sánchez; e o director de hipermercados, supermercados e gasolineiras Eroski en Vegalsa-Eroski, Florentino Vázquez.

“Desde Vegalsa-Eroski, alentamos a todos os nosos clientes a que lean historias e expandan a súa imaxinación como fixo Begoña Caamaño, e non hai mellor forma de facelo que xunto ao marcapáxinas conmemorativo que podedes conseguir nas nosas tendas de Vigo durante este fin de semana”, remarcou Florentino Vázquez na súa intervención.

Compromiso coa identidade e a cultura galega

A aposta por potenciar os valores da identidade galega reflíctese no seu cadro de persoal, oito mil cento vinte traballadores, o oitenta e oito por cento na comunidade autónoma de Galicia, e na súa aposta polos provedores galegos.

Tamén nas súas tendas, incluíndo o galego nos rótulos na súa comunicación comercial, e na súa marca propia, rotulada nos catro idiomas oficiais de España. Sen esquecer o seu apoio a iniciativas que contribúen á súa conmemoración e posta en valor como este Día das Letras Galegas.