O Goberno avanza no plan de reforzo do sector da madeira

A Xunta de Galicia elaborará un Plan Director do sector forestal da madeira para o período 2026-2028, co obxectivo de fortalecer esta industria, fixar poboación no territorio e xerar emprego nun ámbito que considera líder a nivel estatal. O Goberno galego lembra que a industria da madeira representa o 5,5% da cifra de negocio total en Galicia e dá emprego a máis de 13.600 persoas. Ademais, en 52 dos 313 concellos galegos, o sector forestal supón máis do 30% dos establecementos existentes, e en sete comarcas sitúase entre as tres principais actividades industriais. A súa facturación anual supera os 2.400 millóns de euros e achega arredor do 1,7% do Produto Interior Bruto galego.

O Consello da Xunta abordou o estado de tramitación deste plan, que será remitido aos axentes que participaron na súa elaboración para recoller achegas. Así mesmo, solicitaranse informes ao Consello Económico e Social e ao Consello Galego de Economía e Competitividade antes da súa aprobación definitiva.

O borrador do Plan Director estrutúrase en cinco eixes de actuación e sete ámbitos prioritarios, que inclúen a internacionalización, a dixitalización, a sustentabilidade e o factor humano. O documento contempla un sistema de seguimento conxunto co propio sector, que permitirá adaptar ou redefinir as medidas en función da súa evolución e das novas necesidades detectadas.

Faixas secundarias

O Consello avaliou o proxecto de acordo para iniciar a contratación dos primeiros lotes de traballos de xestión da biomasa nas franxas secundarias, no marco do novo convenio asinado entre a Consellería do Medio Rural e a empresa pública Seaga. Trátase dun total de 12 lotes, cun investimento próximo aos seis millóns de euros, IVE incluído, que permitirán actuar en todo o territorio galego: tres lotes na provincia da Coruña, dous en Lugo, catro en Ourense e tres en Pontevedra.

Este orzamento permitirá intervir en case 1.900 hectáreas e en máis de 37.000 parcelas pertencentes aos concellos que se adhiran ao convenio. A normativa de incendios establece que os titulares das parcelas teñen ata o 31 de maio de cada ano para realizar unha correcta xestión da biomasa; a partir desa data comezan as inspeccións.

Avances en dependencia

Por outra banda, o Consello da Xunta analizou un novo informe de seguimento do Plan de axilización e simplificación dos trámites de Dependencia e Discapacidade, que reflicte que no seu primeiro ano se resolveron 86.319 expedientes, un 92,4% máis ca no ano anterior. 

En materia de dependencia incorporáronse 28.737 novas persoas atendidas e recoñeceuse a discapacidade a 57.582 cidadáns. 

Ademais, reduciuse en dous meses o tempo de espera, malia que en Galicia as solicitudes aumentaron un 89%. A Xunta destaca que as medidas aplicadas están a funcionar, grazas á redución da burocracia, a mellora da coordinación co Sergas e o reforzo de persoal.

Sete repotenciacións que substituirán 222 muíños

A Xunta de Galicia tramita sete novas solicitudes de repotenciación de parques eólicos xa existentes na comunidade, presentadas nos últimos meses polos seus promotores. Trátase dos parques Barbanza I, Barbanza II, Farelo, Serra da Loba, Monte Treito, Serra do Cando e Monte Seixo Cando. Estes proxectos prevén unha redución moi significativa do número de aeroxeradores: pasarían dos 259 actuais a só 37, o que supón eliminar 222 muíños, mantendo practicamente a mesma potencia instalada, superior aos 190 megawatios.

Segundo un informe conxunto das consellerías de Medio Ambiente e Economía, esta repotenciación baséase na substitución de aeroxeradores antigos por outros máis eficientes. Grazas a esta mellora tecnolóxica, estímase que, con moitos menos dispositivos, a produción enerxética poida incrementarse nun 35% mantendo a mesma capacidade. Así, no caso de autorizarse estes sete proxectos xunto con outros nove xa aprobados entre 2024 e 2025, un total de 16 parques pasarían de producir 1.108.000 MWh anuais a 1.495.000 MWh ao ano. Ademais, calcúlase que se evitaría a emisión de máis de 702.000 toneladas de dióxido de carbono cada ano.

En conxunto, a Xunta destaca que Galicia estaría en condicións de reducir o número total de aeroxeradores de 620 a 111, reforzando ao mesmo tempo os seus obxectivos de descarbonización. O Goberno galego tamén subliña a axilización dos prazos administrativos, indicando que esta mellora xa se notou nos proxectos autorizados recentemente e que as novas solicitudes poderían resolverse ao longo de 2026.

Actualmente, Galicia conta con 4.022 MW de potencia eólica instalada repartida en 194 parques en funcionamento. Non obstante, unha parte relevante desa potencia está afectada por recursos xudiciais, o que dificulta o avance dos obxectivos climáticos en opinión da patronal eólica. Por último, o Consello avaliou unha nova convocatoria de axudas ás enerxías renovables, dotada con 17,5 millóns de euros.