Galicia celebra o 189 aniversario de Rosalía de Castro reivindicando a súa figura e legado

Este 23 de febreiro, Día de Rosalía, Galicia volveu render homenaxe á súa autora máis esencial coincidindo co 189 aniversario do seu nacemento, en 1837, no que daquela era o municipio de Conxo, hoxe Praza de Vigo de Santiago. A xornada serviu para reivindicar a vixencia das súas loitas e mostrar, a través de nenos e mozos, que Rosalía “está máis viva que nunca”.

En Santiago, os actos comezaron cunha ofrenda floral na Praza de Vigo, no lugar onde estaba a desaparecida casa natal de Rosalía. A asociación veciñal Raigame pediu máis atención e un “trato digno” para a memoria da escritora. Ao acto asistiron autoridades como o conselleiro de Cultura, José López Campos, os alcaldes de Santiago e Padrón, Goretti Sanmartín e Anxo Rei, a deputada de Igualdade, Lingua e Dereitos Civís da Deputación da Coruña, Sol Agra, e o presidente da Fundación Rosalía, Anxo Angueira.

O evento contou coa actuación musical de Os Carapaus e coa participación de alumnos dos colexios Cluny e Quiroga Palacios, que recitaron poemas e cantaron versos de Rosalía. Anxo Angueira destacou que, a pesar de cumprir 189 anos, Rosalía “está feita unha rapaciña” e reivindicou a vixencia do seu discurso de igualdade, independencia e liberdade.

O alcalde de Padrón, Anxo Rei, definiu a Rosalía como “punto de entendemento”, mentres que a alcaldesa de Santiago, Goretti Sanmartín, resaltou a súa “rebeldía” e “inconformismo”, describíndoa como unha muller valente, brava e combativa, lonxe do tópico de “muller choricas”.

Sol Agra reivindicou á Rosalía defensora dos dereitos das mulleres, do respecto aos traballadores galegos que emigraban a Castela, da lingua propia e do medio ambiente, resumindo que “defender Rosalía de Castro significa tamén defender o feminismo, a xustiza social e a lingua nai”.

O conselleiro de Cultura, José López Campos, definiu á escritora como unha precursora que mostrou a dignidade do pobo galego e un “faro guía” en materias como o feminismo e o galeguismo. Destacou tamén que a homenaxe se estende á rede de bibliotecas públicas e aos servizos de bibliotecas móbiles, que durante esta semana programan actividades para achegar a vida e obra da autora a todos os públicos.

Os asistentes trasladáronse logo ao Panteón de Galegas Ilustres, acompañados polo son das gaitas, onde se realizou outra homenaxe con lecturas de poemas diante do lugar onde descansan os restos de Rosalía. Participou tamén o presidente do Parlamento galego, Miguel Santalices, que a definiu como un dos piares da identidade colectiva e democrática de Galicia. Xa pola tarde, a Casa da Matanza en Padrón acolleu o tradicional Caldo de Gloria.

Ao longo de toda a Comunidade, concellos, entidades culturais e colexios organizaron actividades. O Concello de Santiago publicou un bando municipal reivindicando a “mensaxe combativa” de Rosalía. En Ourense e Lugo celebráronse actos institucionais con escolares, mentres que a cátedra da USC promoveu unha lectura antolóxica guiada polo poeta Jaume Subirana, e Teófilo Edicións presentou un estoxo especial con sete obras en prosa da autora.

Na Deputación de Pontevedra, o presidente, Luis López, anunciou unha nova edición do certame Canta Rosalía, que convida aos centros de Primaria e Secundaria a gravar vídeos recitando os versos da escritora, fomentando así a difusión da súa obra entre as novas xeracións.