O galego, o catalán e o éuscaro xa son cooficiais no Congreso

O Congreso dos Deputados aprobou onte por 179 votos a favor y 169 en contra y 2 abstenciones o cambio do regulamento que permite o uso do galego, o catalán e o éuscaro na Cámara Baixa. As linguas cooficiais poderán empregarse nas intervencións parlamentarias e na presentación de iniciativas. Os primeiros deputados en falar en galego baixo a nova normativa foron José Ramón Gómez Besteiro (PSOE), Marta Lois (Sumar) e Néstor Rego (BNG), o único que fixo a súa intervención exclusivamente en galego.

Precisamente, o parlamentario socialista foi quen abriu o debate, despois de que a portavoz do PP, Cuca Gamarra, tentase sen éxito paralizar a implantación das linguas cooficiais no debate do regulamento. Despois, os deputados de Vox interromperon a palabra de Besteiro e abandonaron o hemiciclo deixando no escano do presidente do Goberno en funcións, Pedro Sánchez (ausente), os auriculares da tradución simultanea.

O representante do PNV, Joseba Aguirretxea, celebrou a saída de Vox. “Son os mesmos que antes nos botaban da clase, multábannos ou nos metían no cárcere por falar eúscaro. Agora hanse ir eles, algo avanzamos”, afirmou.

A iniciativa, que promoveron o PSOE, Sumar, ERC, Bildu, PNV e BNG no contexto das negociacións entre partidos para unha eventual investidura de Pedro Sánchez, tamén tivo o respaldo de Junts y de Coalición Canaria. A aprobación fíxose polo procedemento de lectura única, é dicir, no pleno e sen pasar pola Comisión de Regulamento, que está por constituír. Así as cousas, o PSOE, Sumar e os seus socios independentistas e nacionalistas celebraron que a normalidade lingüística chegase ao Congreso no primeiro pleno plurilingüe e censuraron que o PP rexeite a reforma do Regulamento que se tomou en consideración para que os deputados poidan utilizar calquera das linguas cooficiais no seu traballo parlamentario. Marta Lois, a portavoz de Sumar e deputada por A Coruña, atacou ás identidades “pechadas e á defensiva” que rexeitan esta reforma e que son, ao seu parecer, quen “tradicionalmente fixeron fracasar o país” e por riba se proclaman “constitucionalistas”.

PSOE sen convicción

Pola súa banda, a portavoz de Junts, Míriam Nogueras, recalcou que o PSOE aceptou o uso das linguas cooficiais por “necesidade” non por convicción, pero festexou que por fin o catalán se poida falar e escoitar no Congreso malia a “obsesión por liquidar a identidade catalá” que, ao seu xuízo, primou durante décadas en España. Nogueras congratulouse de poder “desbloquear en semanas o que parecía imposible”.

O líder de Vox, Santiago Abascal, anunciou que o seu partido presentaría pola tarde no Senado unha iniciativa para eliminar o uso das linguas cooficiais na Cámara alta.