A campaña de Nadal do Centro de Transfusión de Galicia pedirá doazóns de sangue en 150 concellos galegos

Co obxectivo de facilitar o acceso aos doadores, o CTG rotará a presenza de dez unidades móbiles de doazón ao longo da xeografía galega, para realizar preto de 400 campañas de doazón de sangue entre decembro de 2010 e xaneiro de 2011. Ademais, existen locais de doazón permanentes nas sete grandes cidades galegas.

Son precisas 500 doazóns diarias en Galicia, segundo o Centro, e esta cifra mantense en vacacións 'polas urxencias a causa dos accidentes de tráfico'. Segundo datos proporcionados por este organismo, ao longo de decembro deste ano serán necesarias 10.000 doazóns de sangue.

O Centro de Transfusión de Galicia engadiu que, nas datas de nadal, resultan especialmente necesarias as achegas de sangue do tipo cero negativo.