O 70% de titulados superiores xa ten traballo aos tres anos

O Instituto Galego de Estatística (IGE) confirma a alta inserción laboral dos titulados no Sistema Universitario Galego, tal e como se reflicte nun estudo onde se analiza a situación dos egresados no curso 2021-2022 no seu primeiro ano tras obter a titulación e a súa evolución nos tres anos inmediatamente posteriores, tendo en conta, principalmente, as afiliacións á Seguridade Social.

A radiografía do IGE súmase ao mapa de inserción laboral que elabora periodicamente a Axencia para a Calidade do SUG (Acsug), aínda que neste caso examínase a situación dos titulados seis anos despois de titular e faise a través de entrevistas persoais. En ambos casos, os datos reflicten unha dinámica alcista na evolución da inserción laboral dos titulados universitarios a medida que se avanzan os anos tras lograr a titulación, tanto sexa de grao como de mestrado.

Segundo o estudo do IGE, o 70% dos titulados universitarios galegos no curso 2021-2022 está traballando tres anos despois de graduarse mentres que un 25% opta por seguir formándose ou por outras opcións como preparar unhas oposicións ou estar afiliado a unha mutualidade dun colexio profesional. Neste caso, o estudo abrangue as persoas tituladas nas universidades galegas que residen ou traballan en Galicia, para o cal se tivo en conta a alta laboral na Seguridade Social ou na Mutualidade Xeral de Funcionarios Civís (MUFACE).

Formaron parte do estudo un total de 11.242 persoas egresadas no ano 2022 en Galicia e que residen e traballan na comunidade autónoma, a razón de 4.451 titulados da Universidade de Santiago de Compostela (USC), 3.707 da Universidade de Vigo (UVigo) e 3.084 da Universidade da Coruña (UDC).

Os datos constatan unha perspectiva positiva da relación entre os titulados e o mercado laboral a medida que pasan os anos. Así pois, se ao ano de graduarse, o 57,08% está traballando, esta porcentaxe sube ao 70,45% tres anos despois. Pola contra, o número de persoas que continúa estudando tras obter unha titulación descende do 16,46% ao ano de titularse ao 5,9% logo de tres anos. Tamén baixan as persoas que, unha vez tituladas, se atopan noutra situación como preparar unha oposición ou que exercen a súa profesión afiliados a unha mutualidade, que pasa do 22,2% ao 19,57% en tres anos. As persoas en situación de desemprego mantéñense en niveis baixos e estables, cun 4,26% ao ano de titularse e un 4,08% aos tres anos.

A mellora da inserción laboral co paso do tempo reflíctese en todas as ramas de coñecemento, aínda que a incorporación ao emprego é máis rápida nas áreas de Ciencias da Saúde e Enxeñaría e Arquitectura, mentres nas áreas de Artes e Humanidades e Ciencias Sociais e Xurídicas, destaca unha maior presenza de persoas que continúan estudando.

A Xunta destinará máis de 70 millóns a axudas para estudantes e investigadores

A Xunta de Galicia destinará en 2026 máis de 70 millóns a axudas para estudantes e investigadores das tres universidades públicas galegas. A Consellería de Educación, Ciencia, Universidades e FP difundiu onte o calendario de datas previstas para a publicación dunha ducia de convocatorias de bolsas e premios a través das que se materializará este investimento. Precisamente hoxe publícase a primeira destas convocatorias, a dirixida aos estudantes Erasmus+.

“Cómpre destacar que este orzamento total é estimado e que, previsiblemente, se incrementará a medida que se vaia concretando o importe dalgunhas convocatorias”, advirte o Goberno galego nun comunicado.

Este amplo paquete de bolsas súmase á matrícula gratuíta, medida que implantou a Xunta “de maneira pioneira en España e que xa beneficiou a máis de 28.000 alumnos” nos dous anos que leva en vigor. Así mesmo, as taxas de matrícula levan conxeladas desde hai 14 anos. Trátase de medidas que converten ao sistema universitario galego no máis accesible e o que máis igualdade de oportunidades ofrece de toda España.

Calendario

O calendario inclúe tamén contratos en distintas etapas da carreira investigadora, especialmente nos dez primeiros anos logo de obter un grao, o que permite desenvolver unha tese doutoral en catro anos e continuar un proxecto de investigación nos seis seguintes. Tamén axudas para estudantes de grao para realizar estadías Erasmus en países da Unión Europea ou participar noutros programas en calquera universidade do resto do mundo. E bolsas para realizar cursos de idiomas no estranxeiro no verán ou para financiar un máster universitario a persoas en situación de desemprego. Igualmente, convocaranse premios para distinguir o esforzo e a excelencia universitaria. A primeira das convocatorias é a destinada a complementar as bolsas dos estudantes que participan no programa Erasmus+ da Unión Europea, dotadas con case 2 millóns.

Así mesmo, xa contan con data de publicación as principais convocatorias para os científicos que desenvolven o seu traballo nas universidades públicas, así como noutros organismos de I+D+i da Comunidade. Así, o 19 de xaneiro convocaranse as axudas para grupos de investigación, cun orzamento de case 29 millóns. E o 27 de xaneiro publicaranse as axudas de apoio ás etapas predoutoral e posdoutoral (32 millóns). Tamén no mes de xaneiro publicaranse as bolsas para estadías noutros países co obxecto de aprender a súa lingua no verán.