A UVigo presentou a "G-Night" máis creativa e espallada

No ano do seu décimo aniversario, a Noite europea dos investigadores regresará este outono a Galicia con folgos renovados, da man dunha decena de universidades, centros e institutos de investigación, coordinados pola UVigo. Coa creatividade e a súa relación co coñecemento científico como eixo do evento, e baixo o lema 'Conciencias creativas', a Noite galega das persoas investigadoras (G-Night) encherá o 24 de setembro as cidades de Vigo, Ourense, Pontevedra, Santiago, A Coruña, Ferrol e Lugo de actividades de divulgación en lugares afastados dos laboratorios, como rúas, museos, praias e bares. Nun ambiente festivo, e a través de conferencias, obradoiros manipulativos, rutas, teatro, música ou experimentos, pequenos e maiores, con independencia dos seus coñecementos científicos, poderán achegarse ás e aos profesionais da investigación, e así coñecer o valor do seu traballo, así como a importancia desta actividade na sociedade e tamén a das vocacións científicas.

Cun financiamento de preto de 154.000 euros, procedentes do programa marco H2020, as universidades de Santiago e A Coruña, o Cesga, a Unidade de Cultura Científica da Delegación do CSIC en Galicia e Instituto de Investigacións Mariñas, o Centro Oceanográfico de Vigo (IEO, CSIC), Gradiant, Itmati, Inibic e Sebbm, integran o consorcio, coordinado pola UVigo, que desenvolverá a Noite galega das persoas investigadoras, que ademais de nas cidades galegas, celebrarase de xeito simultáneo en máis de 360 localidades de toda Europa.