Podcast | María Mayán e Alba Casanova: ciencia e arte, dúas disciplinas máis próximas do que parece

A Universidade de Vigo reforza a súa aposta por achegar a ciencia ás novas xeracións coa publicación da sexta edición do catálogo 'Quero ser investigadora', unha iniciativa que recolle as historias persoais e profesionais de dez científicas da institución co obxectivo de espertar vocacións STEM, especialmente entre as nenas.

A publicación, ilustrada mediante a técnica da colaxe pola artista Alba Casanova e financiada pola Fundación Española para la Ciencia y la Tecnología (FECYT), forma parte do programa Ciencia de Ida e Volta, impulsado pola Unidade de Cultura Científica e da Innovación da UVigo.

"Non fai falta ser un señor de pelo branco para ser científica"

Unha das protagonistas do catálogo é a investigadora María Mayán Santos, quen durante o podcast gravado en Atlántico defendeu a importancia de romper cos estereotipos que aínda rodean a profesión científica. "A única condición para ser investigadora é ter motivación e ganas de aprender", explicou, que lembrou ademais que foi a primeira universitaria e a primeira científica da súa familia, un exemplo co que pretende demostrar que calquera nena pode desenvolver unha carreira investigadora.

A científica tamén destacou que a vocación non sempre aparece na infancia e que moitas persoas descobren a súa paixón pola investigación durante a universidade ou mesmo máis adiante.

A ilustradora Alba Casanova subliñou que un dos maiores retos do proxecto foi trasladar investigacións complexas a unha linguaxe visual comprensible para o público infantil sen perder o rigor científico.

Ao seu xuízo, a creatividade é un elemento común tanto á arte como á ciencia. "As persoas investigadoras tamén precisan imaxinación para atopar solucións novas", defendeu, ao tempo que reivindicou o papel da ilustración como ferramenta de divulgación.

Un catálogo para inspirar ás futuras investigadoras

O catálogo chegará a preto de 200 centros educativos de Galicia, onde servirá como recurso para achegar a realidade da investigación ás aulas. Tanto Mayán como Casanova coincidiron en que o principal obxectivo é que as nenas poidan verse reflectidas en referentes próximos e comprendan que detrás de cada científica hai unha historia persoal, esforzo, perseveranza e paixón por descubrir.

Durante a conversa tamén abordaron o crecente impacto da desinformación e dos bulos científicos, especialmente nas redes sociais. María Mayán defendeu a necesidade de reforzar a colaboración entre investigadores e medios de comunicación para ofrecer información rigorosa e reclamou unha maior regulación dos contidos falsos relacionados coa saúde e coa ciencia, ao considerar que poden ter consecuencias directas sobre a vida das persoas.