Podcast Ciencia de Ida e Volta | Misterio no Pazo: teatro inmersivo e ciencia en Castrelos

Castrelos prepárase para unha tarde diferente. Este xoves, 9 de abril, o Pazo de Castrelos converterase nun escenario de intriga e ciencia coa obra ‘Misterio no Pazo’, unha experiencia de teatro inmersivo que mestura investigación, enigmas e contido científico. A iniciativa está organizada pola Unidade de Cultura Científica da Universidade de Vigo, en colaboración co Concello, e celébrase dentro do proxecto Ciencia de Ida e Volta, con financiamento da FECYT.

A historia adapta a novela 'Un cadáver en la biblioteca', de Agatha Christie, e pon o público no centro da acción: quen queira descubrir quen asasinou a Ruby Keene deberá enfrontarse a probas e retos científicos, interactuar cos personaxes e desentrañar pistas para chegar á verdade.

Mónica Camaño interpreta á señorita Marple, a famosa detective de Christie. Pola súa banda, Tino Quintela, investigador da Universidade de Vigo, deixa por un momento o laboratorio para representar ao Marqués de Quiñones de León.

Unha segunda volta aberta a todos

Tras o éxito das primeiras funcións, dirixidas ao alumnado de Secundaria, esta nova sesión está aberta ao público xeral e á comunidade universitaria. Con dous pases, ás 17.30 e ás 18.30 horas, no Museo Quiñones de León, e un máximo de 50 persoas por sesión, a actividade permite que quen participe se mergulle de cheo na historia e na ciencia, nunha combinación pouco habitual pero moi atractiva. A entrada é gratuíta, pero require reserva previa en Museos Educa.

Ciencia, teatro e intriga

As probas científicas que completan a obra inclúen retos de observación, análise e dedución, que permiten ao público implicarse directamente na resolución do misterio. O espazo histórico do museo fai que a experiencia sexa máis intensa e inmersiva, enchendo de vida o escenario.

O resultado é unha tarde diferente en Vigo, na que a intriga de Christie e a divulgación científica convértense nunha mesma experiencia para todos.