Zurita levanta os brazos e Faura é líder

Terceira etapa da Volta a Galicia e troco de liderado, de novo. A xornada en Xinzo da Limia tivo un claro protaganismo para os equipos galegos, que se amosaron como os máis combativos da xornada ó estar presentes nos cortes principais do día e, sobre todo, catro deles meteron a corredores no grupo de seis que chegou á liña de meta e que, salvo sorpresa mañá, decantan a clasificación xeral da ronda autonómica. Ricardo Zurita, do High Level moañés, acadou a primeira posición e José Luis Faura, do Padronés Cortizo, é lider da xeral con máis de medio minuto de renda sobre Estanislao Calabuig (Caja Rural), mentres que Charles Genner (a 47) mete no terceiro chanzo do podio a un integrante do Retelec redondelán. No mesmo tempo se atopa o cuarto, Lucas Lopes, do Supermercados Froiz.

A primeira metade da etapa estivo marcada polos ataques ata que se fixo a escapada do día que foi neutralizada a maís do corenta de meta e aí marchouse o sexteto que chegou ó final. O muro de Trandeiras, no circuito final ó redor de Xinzo, rachou o pelotón, pero non o grupo cabeceiro que xogouse a vitoria, que foi para Ricardo Zurita, un ciclista cunha coñecida punta de velocidade, e Faura desbancou a Pablo García, do Polti Kometa, do liderado da clasificación xeral.

O conxunto de Padrón buscará defender hoxe a primeira paza na última etapa con final en Sanxenxo. Para iso dispón dun plante forte. O ascenso a Monte Castrove é o punto chave da xornada.