Zarautz será o rival de Tirán e Samertolameu

A embarcación de Ares rematou onte na oitava posición da Bandeira Concello de Boiro da Liga ACT e Zarautz foi décima, polo que superou á traiñeira vasca na clasificación xeral por dous puntos e evita o 'play-off' de final de tempada. O barco de Ferrolterra continuará na máxima categoría do remo e será a traiñeira vasca a que loite por as dúas prazas en xogo para 2021 na ACT. Os seus rivais serán as traiñeiras moañesas de Tirán Pereira e Samertolameu, ademais da vasca de San Pedro e a cantabra de Pedreña. Cinco barcos para dúas prazas tras o descenso directo de Kaiku, pechacancelas da máxima categoría. Bermeo o 19 de setembro e Portugalete o domingo 20 acollerán o evento.

No referente á loita pola vitoria en Boiro, Santurtzi superou en 30 centésimas á Zierbena dos vigueses Jaime de Haz e Juan Zunzunegui. Deste xeito, acada dous puntos de renda no liderato sobre Hondarribia, onte terceira, cando quedan dúas probas por celebrarse na ACT. Será tras a Bandeira da Concha, que comeza o mércores coa clasificatoria feminina e o xoves disputárase a masculina en San Sebastián. Empezan as dúas semanas e media máis importantes da tempada.