Vexo Moaña, vexo Chapela

Calma en Cesantes, día tras a choiva e entre nubes. Deses nos que se observa claramente a ponte de Rande e, ó ser pola mañá e non facer calor, a coñecida brisa térmica da Ensenada de San Simón non aparece. Deixa o mar como un prato, que da gañas de bañarse nel e chapotear como un neno pequeno. En definitiva, un día óptimo para vogar, pero para facelo ó máximo, sen deixar un gramo de forza en cada pada porque a xornada está para facer todo o esforzo posible. Sempre a fondo, sen deixarse nada e así foi a regata de traiñeiriñas vivida onte. Ó máximo.

Neste contexto, o club de Tirán rachou o mando que se podía intuír de Chapela tras a tempada de bateis. Non obstante, atoparon oposición no club do Con, que apunta a loitar polo mando do barco de seis compoñentes no sur de Galicia. Así, foi o club morracense o que mandou na categoría sénior masculina, que pechou a xornada deportiva. Vitoria para o primeiro barco, o de Tirán (13:51.91), e segundo posto para o filial, Moaña, a case dez segundos. Samertolameu cerrou o podio, con Chapela no cuarto posto. Pero seguro que os beretes suben un chanzo o seu nivel nunha semana, no Territorial Sur.

En mulleres, todo foi laranxa, con primeiro e segundo posto atendendo ó reloxo, pero soamente contou un bote berete (15:42.86) na clasificación porque o gañador misturaba categorías. Robaleira, a catro segundos, asinou a segunda posición e Moaña foi terceira.

O día de regatas en traiñeiriñas comezou coa categoría cadete que viviu unha participación limitada, pero máis alta que en anos precedentes. Na feminina, a primeira praza foi para Vila de Cangas (8:00.51), mentres que Tirán acadou a vitoria nos rapaces (6:59.95), por diante de Robaleira e o barco de Samertolameu.

Xa en xuvenís, o bote de cativas de Mecos ofreceu un recital (16:11.89) ó superar en máis de medio minuto o moañés de Meira, mentres que na categoría masculina a primeira posición foi para Chapela (14:36.15), que superou por unha ampla renda de dez segundos a Bueu.

Por outra banda, a cita de Cesantes estivo precedida pola segunda xornada da Liga Galega de Veteranos, que tivo como gañadores a Puebla, na categoría feminina, e a Samertolameu, na mixta. Entre os dous eventos, superáronse os 500 remeiros nunha gran xornada de remo e deporte.