La primera carrera en el covid

O castro do Monte Trega é un dos mellor conservados de toda Galicia. O trail que sube polo seu monte aspira tamén a ser un clásico. Para acadalo, conqueriu algo tan sinxelo coma titánico neste 2020 marcado pola pandemia do coronavirus: disputarse. Onte tivo lugar a séptima edición da proba do Baixo Miño, na que o ourensán Adrián Rodríguez e a exatleta do Vila de Cangas, agora en Madrid, Eva Piñel apañaron a coroa de reis castrexos co seu triunfo.

Pero a verdadeira vitoria foi que 300 deportistas tomasen a saída dende o centro da Guarda para completar un percorrido de 14 kilómetros cun desnivel acumulado de 800 metros. Todo baixo as máis estrictas medidas de seguridade sanitaria. As clásicas, de máscaras ata a saída e toma de temperatura; e a máis chamativa, en forma de saídas por grupos de dez persoas, que iniciaban a proba en intervalos de 30 segundos.

A proba contou coa atleta olímpica Julia Vaquero como madriña e tamén como corredora. A guardesa estivo adestrando nas últimas semanas para participar na carreira e así o fixo. A fondista máis sobranceira da historia do atletismo galego -inda mantén o récord de España dos 5.000 metros- tomou a saída cunha camisola co seu nome e o dorsal 1, despois de departir con outros atletas cos que mesmo tomou algunha fotografía.

Despois, a correr. Sen mirar atrás. Os participantes percorreron as sendas do Trega cun tempo solleiro que fixo algo máis agradable o duro circuito trazado pola organización, que este ano tivo unha tarefa moi complicada de sacar adiante.

Na liña de meta, Adrián Rodríguez foi o máis rápido. Ergueu os brazos para parar o crono nun tempo de 1:08:01. Tralo ourensán, entrou Álex Goberna, a pouco máis de medio minuto (1:08:38). Case un minuto despois, chegou Daniel Pazó, que se subiu o terceiro caixón do podio cunha marca de 1:09:32.

En canto ás mulleres, Eva Piñel foi a primeira en atravesar a liña de meta. 1:27:12 marcou a ex do Vila de Cangas, agora no Atlético Cervantes de Alcalá. Foi unha vitoria autoritaria, xa que avantaxou en en máis de tres minutos á segunda clasificada. Vanesa Vila firmou un crono de 1:30:17 con escaso marxe sobre a terceira, Tamara García, que acadou un tempo de 1:30:34 na chegada do centro da Guarda.n