O Torneo Concello de Vigo, a piques de chegar aos 1.200

O XII Torneo de Pádel Concello de Vigo afronta os últimos días de inscrición antes do inicio da competición. O prazo para anotarse rematará o luns 22 de xuño ás 23:59 horas e todo apunta a que a cita volverá superar as cifras da pasada edición.

A falta de poucos días para o peche das inscricións, o torneo xa conta con 364 parellas anotadas, un dato que supón arredor de 100 parellas máis que no mesmo momento do ano pasado. Co ritmo actual de participación, a previsión da organización é alcanzar as 1.200 inscricións, o que permitiría establecer un novo récord no torneo, superando as 1.042 participacións da pasada edición. Ademais, alcanzar esa cifra permitiría que Vigo volvese situarse á cabeza dos torneos amateurs a nivel mundial, recuperando un récord que a propia cidade ostentou na pasada edición, cando alcanzou os 1.042 participantes, antes de ser superado este ano con 1.156 inscricións nunha proba na Coruña.

O torneo celebrarase do 26 de xuño ao 5 de xullo nas instalacións de Máis que Auga Barreiro e Navia. Durante dez días, reunirá competición amateur, categorías federadas, pádel adaptado, deporte base e diferentes actividades arredor desta disciplina. Entre as novidades desta edición destaca a incorporación do Campionato Galego de Pádel de Menores, no que preto de 160 nenos e nenas competirán polos títulos autonómicos.