Tirán supera a Samertolameu e Mugardos destaca

Segundo test da tempada para Tirán Pereira e Samertolameu antes do inicio da Liga ACT San Miguel e nova mostra de que o conxunto do Con está un punto por enriba do seu veciño de Meira. Onte, en aguas de Cangas, a "Mar do Con" avantaxou en trinta segundo á "Terca" nunha regata con cinco viradas e seis longos.

A esta distancia chegouse tras un comezo de regata no que se deixaba intuír o contrario porque as dúas embarcacións de Moaña, que tiñan asignados os carreiros un e dous, mantiveron unha bonita loita no longo inicial e foron os de José Ferral os que tomaron a baliza en primeiro lugar cunha renda de dous segundos sobre os de José Ángel Cambados "Truco". Pola súa banda, Mugardos marcaba o terceiro mellor e a un par de segundos de Tirán.

Na seguinte baliza a "Mar do Con" xa puxo a súa proa por diante dos seus veciños, aínda que a distancia era mínima, mentres que a tripulación de Ferrol adaptouse ó ritmo da de Meira. As tres tripulacións distanciáronse claramente das compañeiras de manga e tamén das que competiron na quenda anterior.

Mediada a proba chegou o momento no que se rachou a regata cun barco de Tirán Pereira que aplicou a súa renda ós oito segundos para realizar un segundo treito de competición moito máis rápido que "A Terca". A tripulación de Meira comezou a esquecer a loita pola vitoria e comprobou como Mugardos, que presentou a súa candidatura ó título da Liga Galega, mantíñase a menos de cinco segundos.

Os de Meira aguantaron a praza pero cederon medio minuto sobre o barco do Con, o que parece moito de cara a Liga ACT San Miguel. A tripulación da Ría de Ferrol foi terceira e cunha marxe ampla sobre Vilaxoán, gañadora da quenda intermedia do día.

O barco vigués de Coruxo deixou boas sensacións co sexto posto con nove segundos de renda sobre Amegrove e Chapela tamén amosou unha boa faciana coa sétimo praza. Pola súa banda, Vila de Cangas, Ares, Cesantes e Bueu pecharon a regata.n