O territorial foi repartido

A sesión de domingo do Campionato Provincial de Pontevedra disputado na Etea celebrouse sen problemas e sen as polémicas da xornada previa polo vento. Onte, o aire optou por presentar menos forza e viviuse unha fermosa xornada de remo baixo o sol. Soamente as mangas finais dos senior tiveron momento de ondas e vento para condicionar un pouco o navegar das pequenas embarcacións de cinco compoñentes.

No referente ós números, o palmarés quedou repartido, con tres títulos para Samertolameu e dous para Tirán Pereira, Chapela, Vila de Cangas e o club grovense de Mecos. Nos totais, o club do Con e o do paseo de Cardona meteron a dez tripulacións no Campionato Galego, que comeza o sábado na Pobra e no que os barcos do sur terán a principal oposición de Cabo da Cruz, que acadou oito títulos no seu provincial.

Na cita viguesa, Chapela confirmou o seu potencial nas categorías absolutas ó gañar en homes e en mulleres. Na categoría masculina (9:15.49), con 39 centésimas sobre Vilaxoán e o barco feminino (10:21.37), con case dez segundos sobre Tirán Pereira. Un club do Con que si obtivo a primeira posición co batel alevín feminino (2:38.22) e co xuvenil masculino (9:54.49).

Os títulos de Samertolameu chegaron na categoría de alevín masculina (2:21.37), infantil feminina (5:12.32) e sub-23 masculina (9:24.32). Pola súa banda, Vila de Cangas gañou co batel infantil masculino (4:45.19) e co xuvenil feminino (11:01.11). Robaleira, Virxe da Guía e Cesantes clasificaron a dúas tripulacións para o Autonómico.