Sarai Samartín: “Estou fodida, estamos tristes e doe perder"

A capitá do Conservas Orbe Zendal Porriño, Sarai Samartín, admitiu ó rematar o partido contra o Valur, na final da European Cup na que caeron por un único tanto (25-24), que “estou fodida, non podo decir o contrario. Estamos tristes e doe perder, pero seguro que é algo que valoraremos co tempo”.

Sobre o transcurso do enfrontamento, a xogadora admitiu que “empezamos ben, estivemos por diante ata de tres goles e pasamos uns quince minutos sen marcar. Iso foi o que nos condenou porque aí remontaron e puxéronse por enriba. Non baixamos os brazos e loitamos ata o final, pero non nos chegou”.

No seu caso, o partido é aínda máis especial porque onte rematou a súa traxectoria no club no que leva toda a vida. “A min íame doer incluso gañando porque era despedirme do meu club e da miña casa. Perder é doloroso, unha pena e supón todo porque son moitos anos de traballo. Non é algo que chegou este ano, é algo que comezou moi atrás, de moitos adestramentos e moita xente implicada en todo o proceso. Ó final, estou moi orgullosa de estar xogando esta final. Sei que nuns meses vouno ver doutro xeito”.

Como parte positiva, Sarai Samartín valora a compaña que tiveron en Reikiavik e a expectación que levantou esta final. “Sabiamos que viña xente, pero velos aquí tras unha viaxe tan longa é unha pasada. Agora tamén puiden comprobar toda a xente que había no Porriño. É para estar emocionada. Estou triste pola derrota, pero tamén algo contenta por toda a xente que tentamos emocionar”, rematou a xogadora, que finaliza a etapa no seu club de formación ós 30 anos. Un día moi especial no que quedou a un gol dos penaltis.