A prata queda na casa

Ciclocrós en estado puro o de onte na apertura do Campionato de España 2025 de ciclocross nas Pontes. Baixo a chuvia e sobre moito barro, disputouse a carreira de remudas por combinados autonómicos no circuíto do lago e a defensora do título, Asturias, impúxose por diante de Galicia e Cantabria. Logo de quedar o ano pasado sen medalla, a Selección de Breogán regresou ao podio igualando o resultado do 2023 en Vic. O sexteto formado por Samuel González, Lucas Lozano, Andrés Calvete, Lorena Patiño, Raúl Puelles e Miguel Rodríguez chegou liderando a proba ao seu ecuador, pero nas dúas últimas voltas Asturias tomou o mando e venceu por unha marxe de 1 minuto e 13 segundos.

O elite vigués Samuel González deu a primeira das seis voltas e pasoulle o testemuño ao cadete Lucas Lozano lixeiramente por diante de Euskadi. O marinense só foi superado polo júnior catalán Martí Martínez e no seguinte parcial o máster-40 cambrés Andrés Calvete recuperou a primeira posición para Galicia. A segunda metade da carreira comezou cunha gran volta da júnior marinense Lorena Patiño, que rematou a menos de 20 segundos do máster-40 valenciano Javier Cabanes. Asturias íase achegando á cabeza e no penúltimo parcial, o elite Mario Junquera pasou da terceira á primeira praza. O júnior betanceiro Raúl Puelles mantivo á Galicia coas opcións intactas de pelexar polo segundo posto e o sub-23 ponteareán Miguel Rodríguez arrancou á par do máster-40 cántabro Isaac Suárez para gañaar o duelo pola prata. So Asturias escapou.