Un Porriño celestial

O taboleiro do val do Louro no Porriño viviu onte unha nova edición da súa carreira popular 10K, que tivo o mando dos atletas do Celta porque ata a localidade do Louro acudiu o grupo adestrado por Manu Martínez Ageitos, que aproveitou a cita louriñesa, sempre atractiva pola súa velocidade e os premios ós gañadores, para realizar un adestramento competitivo. Deste xeito, gañou a olímpica Alice Finot entre as mulleres e Asheber Díaz nos homes.

A vitoria na categoría feminina foi moi clara da gala, que sacou máis de tres minutos a Sara Castillo, outra fondista do Celta e adestrada por Álvaro Prieto. Jessara Xavier Santos, do Atletismo Porriño, rematou na terceira posición. A francesa asinou un tempo notable de 33:29, pero quedou a once segundos do récord da proba de Ester Navarrete. En homes, o sub-23 céltico Asheber Díaz amosou un gran estado de forma para, con 30:54, superar en dez segundos a un veterano ilustre como Alejandro Fernández. Anxo Bello pechou a proba da cita longa. A curta, dunha volta ó trazado, foi para Santiago Virgós (15:00) e a sub-18 Sabela Castelo (17:10).

Entre os nenos, disputáronse tres probas conometradas con vitoria para Hugo Rodríguez (7:14) e Nadia Conejo (7:59), en sub-14; Ismael Barros (3:28) e Gabriela López (3:43), en sub-12: e Lucas Ramos (3:51) e Ainoa Conejo (4:03), en sub-10. Un total de 942 atletas remataron a proba longa, polos 272 da curta. Hai que engadir ós cativos para chegar ós 1.287 deportistas.