Ponteareas acolle o sábado a 260 nadadores nun dobre trofeo

O Club Natación Ponteareas organiza este sábado o XXV Trofeo Amizade e o XVI Trofeo Concello de Ponteareas, que conta cunha inscrición de 260 deportistas pertencentes a dez clubs. Será no Centro Deportivo Álvaro Pino e a cita repartirá un total de 1.000 euros en premios entre os tres primeiros e tres primeiras clasificadas según puntos FINA e, por outra banda, permitirá a busca de marcas mínimas para participar nas competicións autonómicas e nacionais.

A presentación da proba, á que asistiu a alcaldesa de Ponteareas, Nava Castro, tivo lugar onte nas instalacións de Love Cars, un dos patrocinadores. Andrés Carrera, presidente do CN Ponteareas, plasmou os obxectivos do club para a presente tempada, tanto en categoría absoluta coma nas categorías de base (dende prebenxamín ata infantil). A principal meta, afirmou o responsable, será manter o número de licenzas do ano anterior (en torno ás 200 sumando todas as categorías) e “seguir a ser un club de referencia no ámbito da natación galega”.