Palabras de Portugal

En Vigo é habitual atoparse portugueses un fin de semana. Cando o sol aperta no estío, están por Samil, e nas pontes, nos grandes almacéns. De recente chegada é o desembarco pola Nadal, pero onte tiveron unha excursión deportiva, que foi directamente á conquista da Super Copa de España Cidade de Vigo de judo, que é unha competición para a idade cadete e na que os deportistas lusos obtiveron sete vitorias en dezaseis categorías, moi preto da metade. Unha fazaña.

Do que non foi para Portugal, sobresaiu a expedición galega, con ata tres vitorias e un total de dezaoito podios. Bos números para ser a mellor selección do estado español e con mando nalgunhas das categorías de máis peso. En homes, Ian Seguín e Breixo Siso asinaron un dobrete na división de -90 quilos. E, en mulleres, este ouro e prata foi en +70. Mawa Camara acadou a primera posición e Antía Januario rematou segunda. A terceira vitoria foi no outro extremo, na categoría de menos peso (-40), na que Candela Costa superou a Vaitiare Pastrana na segunda praza. Do referente á expedición galega, completouse o palmarés coas pratas de Alejandro Chiarroni (Famu vigués), Pancho Lago e Sofía López (Famu vigués), mentres que os bronces foron para Matero Cerillo, Hugo López, Alberto Rodríguez, Sergio Lago, Hugo Viqueira, Leo Bello, Sara Mari Rivera (Galicia Sur vigués), Zeltia Sousa y Atana Úbeda.

Todo nun día de moita actividade no pavillón das Travesas, xa que ata 410 judocas entraron en competición sobre unha pista con cinco tatamis e unha mesa central para controlar todos os aspectos que pasaban, porque o tránsito de deportistas, xuíces e árbitros resultou constante.

Este é o panorama e a fotografía que se observou na pista viguesa no día central do evento vigués, que tivo o mando de Portugal, e para hoxe quedará o peche cunha clase maxistral que terá dúas horas de duración (11:00 a 13:00), que sempre ten unha ampla participación, especialmente da delegación galega porque é un momento bo para mellorar a formación e coñecer algúns trucos que sempre son chaves nas evolucións dos judocas. Formación e competición de alto nivel que ten na cita das Travesas unha reunión anual que serve para observar o nivel das canteiras de toda España e tamén comprobar o nivel de Portugal, que onte amosou talento.