A moañesa Tania Castiñeira acada un ouro no Open de España de taekwondo

Tania Castiñeira (+73, Hebe) acadou o ouro o pasado domingo no Open de España de taekwondo que se disputou en La Nucía, onde Galicia conqueriu tres metais máis. A moañesa arrincou a competición ante Ainhoa Pastor (Madrid) nos cuartos de final e gañou en dous asaltos. Na semifinal, enfrontouse á mexicana Paloma García e o combate tamén rematou en dous rounds. Xa na final, esperaba a estadounidense Hannah Keck. Foi un combate duro que ademais se puxo costa arriba, xa que Keck venceu no primeiro asalto por 2-0. Pero a morracense non se descompuxo e remontou, gañando os dous seguintes asaltos e logrando así a medalla de ouro.

O resto de podios galegos foron o ouro de Iván García (+87, Mat´s) e os bronces de Alma Pérez (-53, Boiro) e de Arlet Ortiz (-62, Mat´s). Unha boa colleita en La Nucía.