A moañesa Castiñeira acabou quinta o Europeo con polémica

A moañesa Tania Castiñeira (+73, Hebe) estivo onte moi preto das semifinais no Europeo de Múnic de taekwondo pero o combate de cuartos ante a logo campioa, a alemá Lorena Brandl, decidiuse por pequenos detalles e por unha penalización moi discutida. Así, a morracense repite como quinta de Europa.

Tras superar un combate de octavos cun inicio sobranceiro, o primeiro asalto ante Brandl, campioa de Europa 2024 e medallista mundial, foi moi duro e táctico, cunha Tania máis activa que, aínda que o intentaba constantemente, non lograba puntuar. Finalmente, perdeu o round por rexistros, cun 0-0 no marcador. No segundo asalto, tratou de acurralar á xermana, moi protexida atrás. O primeiro punto foi para ela tras unha caída de Tania, pero a moañesa reaccionou cunha patada ao peto (1-2). Brandl logrou empatar a falta de 20 segundos ao sacar a Castiñeira da pista. A polémica chegou despois, co 3-2 sinalado polos árbitros ante a incredulidade de Tania e do equipo técnico español. Así, a alemá conseguiu o pase ás semifinais sen lograr puntuar en acción ofensiva durante todo o combate.

Antes, Castiñeira superara á letona Viktorija Helviga, cun contundente 0-5 de saída que logo permitiulle contemporizar (4-7 final) no primeiro asalto. No segundo, en menos de 20 segundos xa dominaba cun claro 0-6 no marcador e acabou cun 0-15.