Fin da carreira, que non da estrada

Chegou ó final da carreira, pero non é o mesmo que rematar a estrada. Aínda quedan moitos quilómetros por percorrer, pero xa non será coa presión de ir rápido, coa necesidade de medir os gramos e a cantidade de grasa do corpo, con control da maquiniña dos watios e observar como responde o pulso. Delio Fernández Cruz, o ciclista profesional moañés, anunciou onte a retirada ós 39 anos de idade porque carecía da motivación necesaria para seguir correndo.

“Nunca pensei que aquel neno de 7 anos que facía gincanas chegaría a dedicarse durante 18 anos ó ciclismo profesional. E chegou o momento de parar… O ciclismo esixe estar ó 100% física e mentalmente e levo un tempo sen conseguilo. Síntome afortunado por todo o que me deu o ciclismo e pola xente que me fun atopando ó longo deste camiño. Quero agradecer todo o apoio recibido durante este tempo, en especial á familia, que me acompañou nos bos e malos momentos e sen eles non sería posible este largo camiño”, escribiu o morracense nas súas redes sociais.

O moañés pasou ó profesionalismo na ilusión do Xacobeo Galicia, aquel proxecto de equipo galego que tanta ledicia deu a afección e que a súa desaparición foi un golpe duro para este deporte a nivel autonómico ata o punto de que aínda marca. Fernández foi dos poucos que atopou un sitio e o fixo no ciclismo portugués, no que comezou dende abaixo para ser unha estrela ó sur do Miño. O cuarto posto na xeral e as dúas etapas na Volta Portugal de 2015 permitíronlle pasar ó ciclismo internacional no Delko Marseille. Durante máis dun lustro foi o único galego nun equipo deste nivel. Auténtica referencia e, nalgún ano, líder do seu equipo co que acadou un triunfo na Volta a Austria (2017).

Regresou a Portugal para enrolarse no Tavira dende 2022 e alí volveu á rutina de facer as mellores carreiras ó sur do Miño con novos triunfos. O último quedará como un símbolo porque foi no teito luso, no mítico Alto da Torre en agosto de 2023. Fotografía que será para o recordo dunha carreira notable, traballada e con perseveranza ata os 39 anos. Remata por decisión propia. Galicia non ten equipo, pero si unha carreira profesional, O Gran Camiño. Foi a súa penúltima carreira, pero a bicicleta sigue como afección e, posiblemente, como futuro. Ten a licenza de director.