Miguel Rodríguez, quinto noutra vitoria de Orts

O Campionato de España de Ciclocrós 2026 pechouse onte con catro carreiras e en todas elas houbo presenza galega no ‘Top 6’. O mellor resultado da nosa comunidade na clausura do evento celebrado en Tarancón (Cuenca) rubricouno Lorena Patiño. A marinense obtivo o seu cuarto título consecutivo nesta modalidade, o primeiro na categoría sub-23, e outorgoulle á selección de Galicia unha segunda medalla de ouro despois da conquistada na véspera polo cadete Pedro Cidrás, tamén veciño de Marín. Pola súa banda, o ponteareán Miguel Rodríguez rematou quinto noutra vitoria de Felipe Orts en categoría elite masculina.

Campioa de España cadete no 2023 en Vic, júnior no 2024 en Amurrio e no 2025 nas Pontes, a ciclista da estrutura Misser Project confirmou na súa estrea como sub-23 que o futuro do ciclocrós feminino español está nas súas pernas. Ademais de acadar a coroa da súa categoría, Lorena Patiño fixo cuarta na clasificación absoluta a 47 segundos de Sofia Rodríguez (Nesta), a gañadora elite no rápido trazado conquense. Un excepcional rendemento ao que non lle afectou nin un contratempo mecánico.

O termómetro marcaba 1°C cando se deu a saída no circuíto da Ermita de la Virgen de Riánsares. Antes de rematar a primeira das seis voltas, a representante da Selección de Breogán adiantou a Marta Beti (Cantabria) e situouse como primeira sub-23. A progresión de Patiño non quedou aí. Despois de soltar á súa acompañante, reduciu ao mínimo a desvantaxe coa terceira e a cuarta elite, pero xusto cando ía contactar con Sara Cueto (Unicaja Gijón) e Alicia González (Nesta-MMR) saíuselle a cadea. A galega tivo que baixarse da bicicleta para arranxar a avaría. Durante ese momento de tensión non perdeu ningún posto e no seguinte parcial superou a Alicia González.

Rodando en solitario como cuarta clasificada, a líder sub-23 moveuse en tempos similares ás tres primeiras e a última volta iniciouna a 25 segundos da cabeza de carreira. Nese xiro final lanzou o seu ataque por diante a valenciana Sofía Rodríguez, que logrou revalidar o título elite con 16 segundos de marxe respecto á asturiana Lucía González (Nesta-MMR). Patiño, que cruzou a liña de meta a 16 segundos de Sara Cueto, avantaxou en 54 á segunda sub-23, a Ana López (Aragón). Pola súa banda, a elite Irene Trabazo, a outra corredora da Selección de Galicia nesta proba, finalizou sétima na súa categoría e 12ª na táboa absoluta.

Miguel Rodríguez, quinto

Outro galego que esta temporada subiu de categoría estivo entre os mellores na carreira elite masculina. Miguel Rodríguez (Supermercados Froiz), campión sub-23 o ano pasado nas Pontes, realizou unha gran saída e conduciu o pelotón durante boa parte da primeira volta. A partir de aí, lanzou a súa ofensiva o valenciano Felipe Orts (Ridley) para proclamarse campión por oitava vez na carreira raíña e o ponteareán moveuse entre a cuarta e a oitava posición. Aos últimos metros chegou formando parte dun trío que se xogou a ‘medalla de chocolate’. Nun esprint de ‘photo finish’, impúxose o cántabro Ismael Esteban (Logos Energía-BH) por diante do galego, que concluíu quinto. Xunto a eles entrou Miguel Díaz (Madrid).

O vigués Samuel González, coas cores de Galicia, meteuse entre os dez primeiros ao terminar décimo. O ‘maillot’ do conxunto autonómico tamén o defendeu o ponteareán Borja Gómez, un ano máis exercendo de capitán da ‘selección de Breogán’ e dando unha lección de inclusión.

A derradeira xornada en Tarancón comezou probas para juniores sobre un circuíto xeado. Tanto na feminina como na masculina, o combinado dirixido polo seleccionador José Alberto del Río apuntouse o sexto posto. Alejandra Neira quedouse a 38 segundos do podio nunha carreira que Xiana Seijo completou na 13ª posición. En canto aos mozos, Marcos Rodríguez encabezou a actuación galega, a 1 segundo do bronce, mentres que José Manuel Pintos e Lucas Lozano ocuparon a 19ª e a 37ª praza. Entre eles finalizou Pedro Liaño (Cortizo), 24º, e Xián Rodríguez clasificouse 40º.