Marea de auga doce

Nigrán é un deses lugares nos que a marea sube e baixa porque ten praias e peiraos. De cando en vez, este movemento dauga ‘traga’ algún coche aparcado onde non debería, pero o que pouca xente sabe é que a marea pode subir en terra e que hai portos en terra no cocello do Val Miñor. Así sucedeu onte no interior porto do Molle, que viviu un particular crecemento do nivel de auga, pero da doce, a da choiva. E, en lugar de ‘tragar’ as bicicletas, o que fixo foi enlamalas un pouco, que é parte da maxia do ciclocrós. Condicións para a vitoria do ponteareán Miguel Rodríguez, a referencia galega dos últimos anos, e de María Filgueiras, do XSM marinense.

A particular xornada de preamar tivo a un total de 224 ciclistas-peixes entre todas as categorías e o primeiro salmón en remontar o trazado para chegar a meta foi un corredor de Ponteareas que tamén é especialista nas probas con barro. Superou en medio minuto ó vigués Samuel González, que situase líder da Copa Galicia porque Ricardo Buba non pasou da sexta praza. Iso si, a cabeza vai compartida con Anxo Carril, do Coruxo, que foi terceiro en Nigrán. Boas novas para o club organizador do evento. Entre os sub-23, Raúl Puelles superou ó propio Ricardo Buba, que foi sexto e segundo no seu grupo de idade.

A competición feminina tivo mando das ciclistas menores de 23 anos e María Filgueiras, do XSM marinense superou por catorce segundos á macedá Sarela Conde, que lidera a xeral da Copa Galicia. Iria Nieto, do Oiense, foi terceira, primeira élite e tamén sitúase na cabeza da táboa no seu grupo de idade por diante da incombustible porriñesa Chus Barros, sexta onte no lameiro nigranés.

As categorías inferiores abriron a xornada de ciclocróss e os pequenos libraron os momentos de marea máis alta porque o forte da choiva chegou ó mediodía. Os gañadores foron Joao Vigario (Domarsa) e Xiana Santos (Betanzos), en xuvenil; Pedro Cidrás (XSM) e Vega Aldrey (Cambre), en cadetes; e Jorge Martín (Avanza O Porriño) e Uxía Giráldez (Avanza O Porriño), en infantís.