O Kae Sport brilla en Tomiño con sete medallas

O pavillón de Goián, en Tomiño, converteuse onte no epicentro do taekwondo en Galicia ó exercer de sede para o Galego de combate, que se disputou ó longo do día cun cento de deportistas e ata oito categorías distintas, en función do peso dos competidores.

O Natural Sport de Ribeira foi o gran dominador da cita. Ata 14 medallas marcharon cara o Barbanza onte, tres delas de ouro. A partires daí, o botín estivo moi repartido. No que respecta ó área viguesa, o clube máis sobranceiro foi o Kae Sport, que acadou sete metais nos pescozos dos seus deportistas. Carla Álvarez proclamouse campiona galega no P8 -as categorías van do 1 ó 10, sendo 1 máis lixeira e 10 máis pesada-. Adrián Davila apañou a prata en P1, división na que Mario Faro, Raquel Morell e Vanesa Roo penduráronse sendos bronces. Mesmo metal que Dani Álvarez (P4) e Edgar Batista (P6), que completaron a colleita da entidade viguesa.

O TKD Cangas foi quen de conquistar catro medallas na cita miñota. Adrián Valladares e Naima Pérez remataron segundos na categoría P6, mentres que Raúl Brun (P5) e Lena Costas (P8) sumaron dous bronces máis para o seu equipo, que marchou de Tomiño cun botín notable.

O outro clube morracense en liza foi o Hebe, máis enfocado en citas de técnica e freestyle. Aínda así, a institución moañesa acadou prata e bronce na P10 cos irmáns Tudor e Radu Ciobanu.

Polo demais, dous clubes vigueses apañaron unha medalla cada un. Ben é certo que o Tao pode presumir de ter un novo campión galego. Iago Mallo pendurou do seu pescozo o ouro da división P6. Por último, o Budo Castrelos festexou a conquista dun bronce. Jonatan Puentes subiu ó terceiro chanzo do podio na categoría P10, a do peso pesado, no certame galego absoluto celebrado onte en Tomiño.