Irmáns galos na Guarda

Irmáns e deportistas. A Guarda é unha desas vilas galegas pequenas e algo illadas nas que, mellor ou peor, todo o mundo coñécese. Debido a este motivo, a chegada de novos veciños sempre é unha nova para comentar no porto, no bar ou na perrucaría. Ademais, se proceden de Francia e xogan en dous equipos do pobo, a súa presenza é merecedora de coñecerse en todos os recunchos da vila. Probablemente, nunhas semanas pasará, pero os irmáns Valero Jodar, Sarah e Vicente, gozan de certa popularidade estes días na localidade da desembocadura do río Miño.

A parella está no Baixo Miño porque a pequena dos dous, Sarah con 20 anos, fichou polo Mecalia Atlético Guardés. A xogadora estivo en Francia a pasada tempada e na actual quería dar o salto á primeira categoría en España. Chegou á formación dirixida por José Ignacio Prades porque "o ano pasado o meu representante mandou un vídeo. Pedíronme ir uns días ata A Guarda para adestrar con eles porque querían verme de preto". Nos días que pasou na Sangriña rematou por convencer a José Ignacio Prades, que decidiu apostar pola prometedora pivote para a presente tempada. Tivo bo ollo o preparador e así o confirma o presidente José Manuel Silva: "No pouco tempo que leva, xa gañou á afección. É unha boa xogadora, que defende moito e tamén aporta en ataque".

O dirixente explica que a chegada do seu irmán non estaba prevista e que foi por iniciativa dos franceses: "Cando fun a Pau a asinar o contrato, xa me falaron os pais da posibilidade de que el viñera. Despois concretouse, pero Sarah está nun piso cunha compañeira e el buscou todo pola súa conta".

A idea dos dous xogadores era aprender español. Neste caso, Sarah volve a ser a que tomou a dianteira, mentres que Vicente "apenas fala, pero entende case todo o que lle indicamos. Quería vir para aprender", afirma o presidente do Sporting Guardés de fútbol, Víctor Lomba. O mandatario explica que "para nós foi unha sorpresa. Chegou a mediados de agosto e comentounos que quería probar co equipo. A verdade é que convenceunos e, habitualmente, xoga titular". A adaptación deportiva de Vicente foi moi boa porque o mandatario indica que "é mediocentro, con moito percorrido e ten un gran desprazamento do balón, especialmente en longo, que é algo que nesta categoría de Primeira Autonómica non é doado de ver".

Neste momento dáse o feito de que os dous xogadores marchan no liderado das súas competicións. Sarah Valero lidera a División de Honra de balonmán e Vicente está no máis alto da táboa do grupo pontevedrés de Primeira Autonómica co Sporting de fútbol. O momento deportivo é magnífico.

A pivote indica que "o meu irmán veuse comigo. Tiña a idea de ir a Vigo, pero finalmente non puido ser e quedou aquí na Guarda. No momento en que asinei xa me comentou que quería vir para coñecer o idioma e o país". Deste xeito, os irmáns convertéronse nuns veciños máis da vila dende o pasado mes de agosto. "Axudámonos mutuamente. No deporte, pero tamén no día a día. Estamos contentos por poder atopar a alguén coñecido en cada partido entre o público".

Mozos que chegaron á Guarda para vivir toda unha experiencia deportiva, pero tamén de vida. Para facelo contan coa axuda de todo o persoal do Guardés e do Sporting. Sarah indica que "aínda non podemos dicir que somos coñecidos, pero si nos coñece a xente de cada un dos clubs. Sorprendeunos a amabilidade da xente e a solidariedade que hai entre eles".

De feito, Victor Lomba así o confirma ó recoñecer que "Vicente está integrado porque todos os nosos xogadores son da zona, da Guarda, do Rosal, Tomiño ou Oia. Entón quedan en moitas ocasións e a verdade é que está integrado. Entende todo, non fala moito, pero xa pilla os chistes tamén". De feito, o dirixente destaca que "se algo non entende, di: "¿perdón?". O repites e xa está. Pero pasa poucas veces. É moi educado".

Sarah Valero, xa chegou con maiores coñecementos de español ata A Guarda. "A verdade é que entende moito. Ó falar nótase que vai máis lento, pero ó vivir con outra xogadora do equipo, avanzou moito nos meses que leva na formación", explica o presidente do club, José Manuel Silva.

Os irmáns Valero Jodar, de pais españois, avanzan co idioma a un gran ritmo pero tamén noutros aspectos da vida da Guarda porque "é outra maneira de vivir, como a hora de comer", afirma a xogadora do Guardés. No seu caso a súa situación aínda é máis extrema porque adestra tarde, chega a casa a unha hora alta e, polo tanto, os tempos son diferentes ós que se manexan en Europa.

No referente á gastronomía, seguro que a adaptación é rápida nunha localidade de porto pesqueiro como A Guarda e que destaca por este aspecto. Os irmáns Valero Jodar, con 20 e 22 anos, sobresaen no principal equipo da vila, o Guardés de balonmán, e tamén no referente do fútbol masculino, o Sporting. Dende Pau, ó sur de Francia, ata o curruncho suroeste de Galicia para aprender, gozar do deporte e vivir toda unha experiencia.n