Un gol máis que o rival

Ten toda a pinta de que a tempada do Balonmán Cangas será tan entretida como cardíaca, tan inesperada como diferente. O certo é que o equipo de Quique Domínguez, polo visto onte en Alicante ante o Agustinos -líder da División de Honra Prata- non é un conxunto que vaia destacar pola defensa nin pola especulación nin por parar os partidos. A formación canguesa xoga ó galope de xeito constante e pasa por tentar marcar sempre un gol máis que o opoñente. A defensa parece secundaria e ante un conxunto de categoría inferior como o de onte, debe atopar máis contribución da portería, porque o dúo formado por Panjan e Mateo Pallas parou moi pouco. Suficiente para superar a primeira rolda de Copa, pero que noutra tarde calquera da Liga Asobal dificilmente serviría para gañar o enfrontamento.

Por aí comezou fraguar a vitoria do Cangas porque chegou ó descanso cunha renda que probablemente non mereceu. Pero a calidade impúxose. No inicio do segundo acto amagou con rachar o partido. Foron uns minutos nos que as defensas, moi superadas, pareceron comezar a render e o cancerbeiro Mateo Pallas encadeou varias paradas. Incluso dúas seguidas. Algo inédito antes do descanso. En varias ocasións, o equipo cangués tivo rendas de dous tantos e con posesión para ampliar máis, pero sempre había un erro, un mal lanzamento ou unha perda.

Mentres, o Agustinos solventou a crise pasaxeira na anotación e volveu a coller ritmo para igualar cedo a 23 dianas. O equipo de Liga Asobal comezaba a pensar que a eliminación estaba máis preto do esperado e Quique Domínguez solicitou un tempo morto que deu paso a un cuarto de hora de intercambio absoluto de goles. Golpe tras golpe, pero sempre con igualdade ou rendas morracenses ata chegar o momento chave.

Foi xa dentro dos dez últimos minutos. Con 31-32, o Agustinos Alicante tivo balón para o empate, pero parou Panjan (que relevou a Pallas). O Cangas marcou despois e xa non volveu a ter o equipo local unha posesión para o empate nos últimos cinco minutos. Incluso Panjan sumou un par de balóns detidos máis. Superou o feito en máis de vinte minutos do primeiro acto. E o ataque do Cangas apenas errou.