O día dos máis fortes

O bosque, entre árbores e as follas do outono no chan, pode ser un lugar para agocharse, pasar desapercibido… Pero non foi onte en Ponteareas porque, ó lado da praia da Freixa, o club da localidade deseñou un trazado con treitos técnicos e chás, pero outros, entre os carballos, de verdaeira tortura. Costa arriba e abaixo, rampas imposibles, paradas e costas sobre un terra que non estaba con lameiro pero si algo branda. Para os ciclistas, o terreo onde é imposible disimular calquera debilidade. O terreo sacaba ata o último gramo de forza dos participantes e así destacaron os mellores de cada quenda ó pouco de empezar, que foron Lorena Patiño entre as mulleres e o local Miguel Rodríguez entre os homes. Dous ciclistas con dobre título de España en categorías inferiores no seu palmarés e que, se toman a saída na Copa Galicia, amosan o seu poderío, como sucedeu onte na Freixa.

Especialmente notable resultou a exhibición entre os homes porque Rodríguez viña de pasar algún apuro en Nigrán o sábado. Alí tivo que agardar ata pasada a metada da proba para marchar en solitario, pero onte asinou unha exhibición. Na primeira volta, pasou o treito de bosque na cuarta praza, pero na segunda xa tiña a todos os competidores detrás e o vigués Samuel González estaba cedendo metros. De feito, chegou ó cumio da terceira costa da zona do bosque abafado, coa respiración ó máximo. A carreira tiña dono e, por detrás, o dúo formado polos ‘coruxistas’ Anxo Carril e Ricardo Buba facían traballo de equipo. O sub-23 Buba tirou máis, pero sería Carril o máis forte na última volta. En todo caso, lonxe dos dous primeiros nun día con amplas diferenzas, as maiores do que vai de tempada.

En mulleres, a marinense Lorena Patiño rachou con celeridade unha proba que subiu o nivel en relación a días precedentes ó acudir ela mesma, Irene Trabazo ou a tamén ponteareá Uxía Soto. Asinaron a primeira, segunda e cuarta praza. Entre elas, a sub-23 Sarela Conde (Maceda), líder da Copa Galicia.

Antes dos maiores, vivíronse as probas de categorías inferiores, con papel destacado do Lynalfa Ponteareas, que gañou a clasificación por clubs. O palmarés completárono Marcos Rodríguez (Maceda) e Xiana Santos (Maceda), en xuvenís; Guillermo García (Avanza O Porriño) e Vega Aldrey (Cambre), en cadetes; e Jorge Martín (Avanza O Porriño) e Uxía Giráldez (Avanza O Poriño), en infantís.