Cos pés no Chans

A mañá encadeou unha carreira tras outra na contorna no colexio público Chans, situado na parroquia viguesa de Bembrive, con cativos e cativas ofrecendo o seu mellor esforzo. | Jorge Santomé

Mañá quente inda sen sol. Roupa e zapatillas listas. Liña de saída á vista e as beiras do percorrido cheas de xente. E, por riba de todo, moitísimas gañas de correr. Así se presentou a situación onte pola mañá no cross escolar do Centro de Educación Infantil e Primaria Chans, un clásico da tamén clásica parroquia de Bembrive, que xa viña de organizar a anterior parada do circuito municipal, inda que neste caso no colexio Mosteiro.

Deste xeito, a mañá dominical congregou a uns 300 deportistas entre os pequenos e pequenas nados entre 2012 e 2021 e os pais e as nais que tamén se decidiron a tomar parte na carreira, que trancurriu polo entorno do centro escolar de Bembrive.

O evento arrincou ás 10:20 coa proba infantil feminina. As maiores completaron dúas voltas a un circuito de 1.500 metros, igual que os seus compañeiros da mesma idade que entraron en acción xusto despois. A partires de aí, as carreiras foron sucedéndose en cascada descendente ata rematar cos pitufos de 3 anos, que correron pola explanada de 100 metros coas habituais caídas e confusións, sempre simpáticas.

O circuito municipal de cross escolar remata o vindeiro 1 de xuño. Será en Castrelos, cunha proba conxunta para todos os centros.