Conde e rei dende o Tea

O castelo de Maceda domina o val do mesmo nome, ó pé da serra de San Mamede, nunha loma do concello ourensán. Lugar de loitas medievais con protagonismo para irmandiños e familias de ‘sangue azul’, pero na modernidade o auténtico conde e rei do ciclocróss galego e o ponteareán Miguel Rodríguez que acadou o cetro galego no histórico circuito do castelo de Maceda. Gañou con solvencia, ó igual que a marinense Lorena Patiño en mulleres. Mandou, pese a estar na idade sub-23.

En homes, ata catro ciclistas comezaron con forza a primeira volta con Iván Feijóo tirando arreo. Pero o de Allariz -centrado na faceta profesional-, xa non é o de anos anteriores. Seguían a súa roda os vigueses Samuel González e Anxo Carril, ata que na segunda volta Miguel Rodríguez tomou a cabeza da proba, puxo o seu ritmo e quedou en solitario na primeira praza con relativa facilidade, pese a que a proba disputouse nun día solleiro e sen o lameiro que gusta do corredor ponteareán do Supermercados Froiz.

Por detrás, reaccionou o salcedense Néstor Frías para rematar na segunda praza e como campión galego sub-23. Pola súa banda, o vigués Samuel González rematou terceiro e segundo da categoría elite. Un mal día tivo o gondomareño Ricardo Buba que, tras unha gran Copa Galicia, quedou fóra do podio sub-23.

Na categoría feminina, a marinense Lorena Patiño amosou unha clara superioridade, mentres que as porriñesas Laura Mira (sub-23) e Chus Barros (elite) apañaron o bronce nas súas carreiras.

Xa nas categorías inferiores, os ciclistas do área de Vigo acadaron o título por medio de Uxía Giráldez (Avanza O Porriño) en infantís e remataron no podio José Manuel Pintos (prata, Ponteareas), en xuvenil; Aarón Rodríguez e Mateo Hermida (prata e bronce, Ponteareas), en cadetes; e Jorge Martín Carrera e Vera Rodríguez (bronce, Avanza e Louriña), en infantís.