O Celta xuvenil, con cinco baixas, visita ó Deportivo en Abegondo

O Celta xuvenil visita esta mediodía a Cidade Deportiva de Abegondo para medirse ó Deportivo (12:00, Gol) no tradicional partido de rivalidade na División de Honra xuvenil entre dous equipos que, habitualmente, loitan polas primeiras posicións da táboa.

Ó partido de hoxe chega a formación viguesa con vantaxe porque suma catro puntos máis que o seu rival. Ademais, a vitoria serviría á formación de Jorge Cuesta para facerse co liderado tras o sorprendente empate de onte do Sporting de Gijón ante o pechacancelas da táboa, o Vilalbés (1-1).

Non obstante, o Celta chega ó partido cun importante número de baixas. Sanmartín, Óscar e Mario están mancados e Franco, dianteiro centro, non pode xogar por sanción. Ademais, o porteiro Fran foi convocado co Celta B e non xogará na Coruña.

Alondras-Areosa (11:30)

O Alondras recibe ó Areosa no campo do Morrazo nun partido chave na loita por eludir as posicións de descenso. O conxunto vigués está en posicións de permanencia cun punto máis que o cangués, xa en zona de descenso. Rivais directos.

Val Miñor-Llano (12:15)

Pola súa banda, o Val Miñor dirixido por Álex Villar recibe no campo de Condomínguez a un Llano 2.000 que está inmerso na loita pola permanencia e, de feito, está igualado a once puntos co Alondras, que ocupa praza de descenso. Pola súa banda, a formación de Nigrán marcha nunha posición máis, cómoda, a novena, pero cun marxe de catro puntos sobre o seu rival. Polo tanto, a vitoria é precisa para evitar meterse na zona baixa. O Val Miñor non está no seu mellor momento e, de feito, suma unha única vitoria nos últimos cinco partidos disputados. Unha situación que tentarán mudar os futbolistas este mediodía.